曼城「三冠王」勝利巡遊。
喺瘋狂激烈嘅英超，「藍月」曼城成就三冠王，少人異議，輝煌嘅成就背後係要經多年磨合同運作，換血有序，唔係沙特用錢請C朗或美斯突入美職咁簡單；今屆大獲全勝嘅關鍵反而係有質素嘅小將，季中穿插得到好多上陣機會又爭氣，俾一班主力喺全季超過60場大小戰役(未計季中世盃)回到氣，季尾先頂得住連場硬仗。只見夏蘭特季尾表現跌晒watt、決賽又早有中場靈魂迪布尼重創離場，仍可以靠今年其實只入3球的奇兵洛迪卡斯簡迪入奠勝球。哥帥嘅整體戰同用人超晒班，曼聯1999年三冠王一屆計起，英超累計3連霸，餘勢仍強；近6屆已5奪英超嘅藍月，今夏可能會針對稍為老化嘅防線補強，並要留意尾兩仗鬥曼聯同國米，完場前門前都係一陣風聲鶴唳，有被追和嘅危機，哥帥應會出手再買多功能年輕中堅。
誰可阻藍月？除了中場正大換血、上屆季尾已回復氣勢嘅利物浦；阻力應該喺面對緊英超賽會115條財務違規指控，新季隨時或要扣分，咪似呢季要狂追阿仙奴，早啲發力，以防不測為上策。