逆流有兩種，被迫同玩獨特，喺香港生活，覺得迫人嘅多；喺英超順流係鬥燒錢，鬥出高人工，博錢搵錢，但由「逆流大叔」禾洛克領軍嘅卡迪夫城，我行我素，其實都幾「英」。個個恨踢、恨教英超，年尾慶七十大壽嘅英超現役最老波士禾洛克，50年職業足球生涯已經係第四次執教英超球隊。不過，佢上年季中曾經講過，唔係好有興趣喺呢個銷金窩打滾，反而領軍由低打上去先有快感。
幫到大馬班主由去年負債逾億鎊，絕地打番上闊別4年嘅英超，大叔撲到水，老細俾晒自由度佢。以卡城今夏用咗唔夠3,000萬英鎊，簽咗6位主要係英冠嘅平價兵加盟，完全同另外兩支升班馬狼隊同富咸喪花成億鎊擴軍嘅方法背馳，老帥擺明想「藍鳥」繼續英冠個套，以小本博大霧。
啱啱主場輸俾阿仙奴，開季4戰得2分，但起碼攞到重返頂級聯賽嘅頭兩個入球，算有交代；只見成場波最有威脅嘅中堅兼隊長桑摩利臣，猛咁頭槌助攻想屈機，無論最終成敗，嗰種先係禾洛克心中嘅鼓聲，同埋喺自己身上搵到嘅尊嚴。