阿迪達有3招可用
領頭羊阿仙奴有冧檔feel，爭霸更緊湊，起碼明晚英超榜首大戰招呼曼城，矚目過歐聯16強淘汰賽。傳統Big Six各有問題同顧慮，就算陣容強如曼聯都要望住鬥巴塞嘅歐霸大戰作輪換。黑馬中，賓福特唔善鬥中下游球隊；以為紐卡素崛起，但佢哋計近6場英超1勝5和失10分，失分係前列最多，唔通班波想住月尾鬥曼聯爭英聯盃？車仔、利記同熱刺都只係望住前4為目標。
既然英超係「失分樂園」，「達一招」唔輪換難望放返終點，求變係必須。首先李安度杜沙特可打中鋒棄尼基迪亞。杜沙特之前喺英超踢白禮頓3場波入5球，對手係今屆車路士、曼城及利物浦，真強隊殺手，做過「偽9號」。第2招用防守性強嘅富安健洋任右閘代賓韋特，令奧迪加特冇後顧喺前場主導反攻。第3招，格列沙加近期推得太前形同虛設，今場宜再跟湯馬士柏迪打雙防中，必要時先同柏迪輪流上前遠射；前面交返俾幾位小「兵」發辦打突擊。藍月想贏上榜首，今場阿仙奴會由攻變守，近兩場受困密集嘅鏡頭，應不會出現！