有一種上位叫史基利
英格蘭國家隊，大賽例牌被唱好，但無法登頂破咒，總被吹捧原因之一係新星大量出產，但最後個個上唔到一線成為世界級球星。一場平平無奇嘅世盃外勝仗，造就今季英超連歐聯出場僅997分鐘嘅18歲左閘路易斯史基利，火速爆紅；但呢位阿仙奴自家青訓產品，有冇斤兩繼續上位，言之尚早。
時勢造英雄，史基利效力嘅阿仙奴同三獅兵團，同樣正受左閘傷兵咒困擾，令呢位現時周薪估計僅4,000英鎊嘅年輕人，獲得千載難逢嘅上位良機。不過佢已唔只一次喺防守上有魯莽嘅行為，經驗不足，守強於攻；阿仙奴嘅情況咁啱又好似三獅，總跟無冠軍緣，真正製造到上位嘅本土頂級新星甚少，十多年前嘅中場韋舒亞同禾確特一閃即逝，最勁係現役嘅布卡約沙卡，可惜上半季俾主帥達Sir用到盡，養傷數月至今。史基利嘅上位，同好多幼獅走緊同一軌跡，表面大好，但路仍漫長，人工暴升後係更大考驗；佢下月歐聯會面對皇馬嘅右路世界級前鋒基利安麥巴比，上位之路係咪繼續直線向上，會係呢位小朋友嘅「大考」。