紅軍2月強戰英超
冇VAR、獎金又奀嘅英足盃，結果係英超前4已有3隊提早收工；英冠包尾踢走英超一哥，第4圈晉級獎金得12萬英鎊，就算第5圈開始會用VAR，提早離場屬明智。利物浦同阿仙奴終極係要向「雙料大獎」英超同歐聯進發，紅軍波士史諾認清形勢，寧留精銳喺利市休息，唔使南下港口出戰，可知前路艱巨，本月要強戰英超。
紅軍喺英超放甩，成為奪標一面倒大熱，不過勢頭喺不斷一周三賽，冇可能場場夫添出場下，有啲滑跌，計近6場作客其實只得兩勝。由明晚惡戰默郡打吡起，15天內要連踢5場英超，包括3場作客；相比又去杜拜曬緊太陽操波，盡地一煲嘅阿仙奴，紅軍同期要多踢2場，呢半個月應該喺史諾上任以來最大考驗。本月冇盃賽間場，唔敢再用遠藤航踢中堅，主力容易拚殘受傷；隊內3大猛將係咪續約外界唔知，隊內一、二線兵戰力證明差距大，又未有新星上到位，爭勝疑點唔少。單計本月3場作客鬥愛華頓、維拉同曼城，如果紅軍攞到當中兩勝，阿仙奴都係專心爭歐聯吧！