「與學生哥踢波好開心」
英超賽會上輪英超建議但不硬性規定，領隊賽前穿著西裝領軍進場，向英女皇作最後致敬；印象中唯獨賓福特領隊法蘭克只穿黑色長袖上衣，作為主人家兼倫敦頂級球會代表之一，個人覺得有點突兀同失禮。賓福特亦錄得升英超以來，最大聯賽主場敗仗。剛被「三獅」初次召入國家隊嘅「蜜蜂」射手艾雲東尼，全場無影無蹤，俾阿仙奴雙中堅嘜死；咁嘅水平入選國家隊，恐怕嚟緊兩場歐國聯鬥意大利同德國，坐冷板居多，跟一班好似哈利卡尼嘅大哥學下嘢。
揶揄變最強動力。阿仙奴「垃圾時間」派出15歲嘅學生哥禾拿尼出場，打破英超最年輕球員出場紀錄，係達Sir玩嘢之舉；只係要將一年多前，艾雲東尼在社交網發文「跟隊友踢波很開心」，恥笑贏阿仙奴好輕鬆嚟反諷對手。場上問題，場上解決，格列沙加由昔日廠迷針對嘅躁漢，變返神級助攻嘅代隊長，而加比爾捷西斯入波後開心大跳猴子舞，聲援受種族歧視嘅巴西隊友雲尼斯奧斯祖利亞，呢啲表現，先係令批評者封口嘅最強還擊。