12碼之科學
今屆淘汰賽其中一個特色，係好多場比賽都需要以互射12碼嚟決勝負。史上最多互射12碼次數嘅世界盃，剛好就係對上兩屆，2014同2018兩屆都各有4次比賽需要以「極刑」決定出線球隊。而今屆都未踢四強嘅賽事，就已經平咗上兩屆嘅紀錄，今屆幾有可能可以破紀錄㖭。
除咗射12碼次數多之外，今屆守門員救12碼仲特別醒神。先唔講接連幫克羅地亞射贏兩次嘅門將利華高域，就連「正賽」法定時間入面，都好多門將成功救到12碼，大牌球星如美斯、哈利卡尼、利雲度夫斯基亦都統統試過宴客。
傳統嘅講法係，12碼嘅轉化率約莫係八成，但今屆到而家為止，入球率只係63%。照道理計，而家啲球員專業化好多，無理由愈射會愈差。咁到底點解啲12碼咁難入？真係啲守門員勁咗？
數據上，守門員的確係勁咗嘅。自1982年世界盃以嚟，門將只係撲出18%嘅12碼，但係今屆呢，撲救率升到上30%，係有史以來最高嘅一屆。點解？有說係今屆賽事使用嘅皮球嘅球感比較輕，好多球員都唔敢冒險射高波，於是改為相對易被撲出嘅地波。今屆世界杯有七成幾嘅12碼都係射地波，遠高於歷屆嘅57%。
咁點先可以大啲機會入12碼？正如前面所講，射地波可能相對上係穩陣啲，但又的確係較易畀門將撲出，所以呢，應該射高波！係嘅，的確係會容易啲射到上山頂，風險好高，你睇哈利卡尼就知，但數據上嚟講，就算計埋偏離目標嘅射門，都仲係射高波入球率較高。所以練波就盡量練多啲上三路，膽大都要技術好呀。