噓聲中前行的MIRROR見面會

MIRROR官方歌迷會Miro最近搞咗一連12場鏡仔solo粉絲見面會，綜合出席粉絲同網上留言反應，大家似乎幾滿意，唔少仲大讚安排；有人更加話後悔冇入場，同宣布活動當日一片批評公司「搞分化」、「食水深」大相逕庭。我有以下三點分享：

一、12場見面會，其實係俾機會每個鏡仔親身見到佢哋嘅本命粉絲。須知道以往團體活動，鏡仔同鏡粉都未必可以咁真心同集中地交流。Makerville今次搞個別見面會，又預告之後有團體活動，以唔同形式見鏡粉，各有各好，亦各取所需。活動後我見到網上有人講一個好得意嘅結論：佢哋分開搞見面會，但係感覺又好似係12子連結一齊咁。

二、環節有誠意，唱歌玩遊戲情深說話之外，最重要係每個鏡粉都真係可以近距離同偶像交流，即使短短嘅，粉絲用盡心思吸引偶像俾反應，呢個真正嘅專屬互動，令唔少粉絲都好興奮。時間係短，但係追過星嘅人都知道，咁樣安排其實非常唔容易，亦係大滿足位，鏡粉開心，鏡仔即使辛苦啲，相信都係難忘嘅經驗。

三、成件事最應該表揚嘅係工作人員，做足12場，唔怕辛苦，亦都唔介意overrun公司爆budget，我覺得係值得遲來嘅掌聲。點解係遲來？因為當初宣布時係被人鬧爆，或者呢個係慣性，咩都鬧左先，質疑咗先，但咁就錯過咗咁難得嘅互動機會啦。(溫提：錯過入場嘅Miro，都可以免費網上睇晒咁多場，都係抵讚嘅。)

事實係，Miro成立兩年，一直面對未做先被鬧爆嘅局面，工作人員每次都喺一片噓聲之中努力，依然堅持每次都做好少少，令偶像粉絲都有個好嘅回憶。講到呢度，我突然諗起MIRROR12子出道頭兩年嘅情景，一路走來嘅軌跡同而家Miro有啲相似，佢哋公司擁抱嘅信念，或者就係「真心的栽種最後會結果」。