Frankie的圈外女友Christy，近日的黑歷史被愈揭愈多。
男團MIRROR成員Frankie女友被起底，網民化身柯南，即使當事人澄清，網民都係繼續講。今時今日，消息係真係假大家唔關心，最緊要有花生食。明嘅！都冇打算改變呢個規律，但呢件事令我再次覺得佢公司自由度真係極高。
Makerville從來唔阻止藝人拍拖，有幾個鏡仔一入行就冇掩飾自己有女友，做男團喎，偶像喎，點可以拍拖㗎？其實藝人拍拖，唔只係fans觀感問題，最重要係藝人嘅另一半，做咩都會入埋公司數，又引來一個「最衰都係公司啦！」炸彈。事實係藝人都未必受你管啦，何況係佢嘅另一半？PR可以做咩？定係自由可能就係風波嘅源頭？但係為咗咁，就收緊自由又係好咩？
講返Frankie，佢喺MIRROR一直都係唔聲唔聲，甚至被人話存在感低，係「隱形人」。我第一次留意到佢，係兩年前佢參演電視劇《IT狗》，飾演放負同時又會爆下金句嘅Never。當時公司魯生仲為佢寫咗個post，認同佢嘅努力係一個演員。《IT狗》係我ViuTv 最愛劇集之一，演員各有發揮，魯生專登寫佢，我覺得係公司都希望大家見到佢嘅努力。
到舊年我睇咗音樂劇《大象的告別式》，Frankie 擔正，有場戲仲要爆喊，冇借位、冇NG、冇剪接幫忙，佢都俾到感情，睇得出係下過苦功。聽講十幾場，佢場場都做到，真係一個演員。Frankie做訪問時都提到，呢套劇冇其他MIRROR成員，令佢突破咗自己，希望令人睇到佢嘅努力。
最近喺fans聚會，Frankie都公開多謝fans支持，話因為有fans支持，過去一年開心咗，亦都enjoy自己嘅工作。其實Frankie上年底已公開自己有新戀情，而喺女友身份未曝光、未被起底前，「皮寶寶」都覺得Frankie呢個轉變同拍拖有關，覺得佢開心咗。
講真，世上冇乜幾多個偶像嘅女友，可以獲得fans認同，皮寶寶都真係好錫Frankie先做到愛屋及烏，近日嘅事相信Frankie同皮寶寶都唔會好過，喺呢個真相唔值錢嘅社會，只能借用Never喺《IT狗》嘅金句︰「如果生活將你擊倒，就先躺下吧！」