姜Son合照
姜濤早排喺社交媒體放咗同Anson Lo嘅合照，除咗惹來隊友Jeremy同ERROR嘅肥仔妒忌留言話「咁我呢？」更引起坊間好多陰謀論，分享其中兩個︰
一：「張相影到姜濤下巴尖尖，擺明就係P圖，實係姜濤有機心地想顯示佢瘦過Anson Lo啦。」
二：「公司迫姜濤post相，仲唔係想分散呂爵安個fans Club嘅負面新聞！」
娛樂圈真係一個作文比賽大會，幾張相可以被無限發揮。話公司想借合照掩蓋其他新聞，如果出幾張相就可以遮蓋，公司就唔使成日要救火。其實藝人就算有P圖，就好似化妝咁普通而合理，竟然被講到係有機心地攻擊其他人。既然都被上綱上線，不如再講大啲，話姜想證明自己靚仔過Anson Lo、係為咗爭女。反正都冇證據。
甚至話姜係想影響美國大選，暗喻民主黨共和黨應化干戈為玉帛，共同選出一個候選人好冇？或者你會覺得我咁講好離譜，但其實我講嘅都係冇證據嘅猜想，本質上係同嗰啲陰謀論冇分別嘅。
咁點解要製造呢啲陰謀論/傳言呢？不外乎兩個字，利益。
呢兩年MIRROR不停被人攻擊係事實，有真有假都好，背後嘅操作一定係利益，為流量、為想捧其他人、為眼紅……大家搵食利字當頭唔出奇，不過代價就大咗啲，唔單止係MIRROR形象同關係受損，仲令成個世界愈來愈多唔科學嘅所謂輿論，冇晒基本嘅互信。
當有個女人有日post咗張婚紗相，你都可以話懷疑佢出軌，post相係為咗令男朋友唔好起疑心，但即使世上有人真係會咁做，我哋有冇需要因為「極小嘅可能性」而污染咗對「絕大部分嘅可能性」嘅信任。我相信呢啲都係睇得太多娛樂圈陰謀論所致，一個男仔post同朋友嘅合照，就係因為佢哋friend囉，咁簡單嘅嘢，都要被人扭曲到勾心鬥角宮廷劇咁。
寫咗咁多字，相信都對呢個風氣冇咩影響，之後肯定會繼續出現好多MIRROR之間勾心鬥角嘅陰謀論、COLLAR係八婆蕩婦嘅謠言、ERROR吃裏扒外嘅論文，成個娛樂圈，彷彿剩係得胡楓同羅蘭清高潔白。大家平時食下花生冇所謂，但當社會上缺乏互信，終有一日會燒到自己。