三獅球員賣好過買
今夏三獅征戰歐國盃嘅大軍，新季英超多數唔順利，甚至係養傷中同前途未卜，話晒位位都係球星，背負「將足球帶回家」嘅重任；但如今英超傳統Big Six全係非英籍領隊，鍾意用自己友好正常，隊內三獅球員值錢又人工貴嘅棄不可惜。阿仙奴出售伊美路維、車仔唔要干拿加歷查同曼聯放手美臣格連活特都為球會大賺一筆。正面睇英超係一個多元嘅頂級聯賽，負面嘅係一班三獅精英，喺大會眼中，多數唔夠班爭位踢。
再睇三獅「鋼門」比克福特開季失波最多，後衛梳爾又唞，查比亞、馬克古希同祖高美斯等俾球會賣走，中場祖迪比寧咸一出即傷；前鋒艾雲東尼未知下一站，卡尼接班人嘅奧尼屈堅斯剛戰對住空門一射一頂不入。講到要喺本月尾關窗前散貨，車仔當然最急，30幾萬英鎊周薪嘅英格蘭國家隊前成員史達寧、當打嘅土炮左閘芝維爾同中場查洛巴都話明唔要；但個個人工高、溢價更高，外借都唔易。熱刺就最獨特，5,500萬英鎊買代表過一次英格蘭嘅箭頭蘇蘭基，但為新東家踢一場即要養傷。