奧運好戲在最後

加勒比海小島聖盧西亞誕生世界女飛人、菲律賓爆出體操雙金男將；祖高域以37歲之齡，頂住膝傷陰霾，一圓金牌夢；奧運近尾聲，好戲更多，尾門之一要留意男子馬拉松。

奧運官網之前發文點出今屆最令人關注嘅12名選手之一，包括美國體操女將比莉絲、中國女乒孫穎莎同美國男籃「大帝」勒邦占士等，最後出場嘅「猛人」，相信係本周六參戰男子全馬嘅肯尼亞「跑神」傑祖基。巴黎奧運為咗彰顯女性運動員實力，唔少項目安排係閉幕日上演，包括女子馬拉松、女排同女籃決賽等等；不過，男子全馬仍然極度矚目，事關39歲嘅傑祖基力爭成為史上首位奧運三連霸氣袋。

該國新跑神、上年喺芝加哥跑出驚人2小時35秒新世績嘅傑騰，年初遇車禍不幸離世；不過，肯雅今次3個全馬代表仍然超級強勁，除傑祖基外，仲有上年「芝馬」跑第二嘅傑魯圖同今年倫敦馬冠軍梅耶奧。男子全馬喺當地早上8點開賽，天氣唔會太熱，有冇猛將突破到人類極限嘅2小時內跑完一個馬拉松，全球跑迷拭目以待！