東尼去沙特嘥料

佐敦軒達臣去夏遠赴沙特伊蒂法克，賺取驚人70萬英鎊周薪嘅3年合約，結果呢位前利物浦隊長踢咗半年，傳頂唔順炎熱天氣同一場比賽可能只得數百觀眾，要求提早解約。有幸得到荷甲褪色班霸阿積士收留，「神軒」周薪大幅減至9萬鎊，但34歲仲可以隊長身份踢嚟緊嘅歐霸分組賽，揾少好多，但同屋企人過返自己原本想要嘅生活。

軒仔嘅故事當然阻止唔到西歐球星湧入呢個油元聯賽，始終踢幾年可以收山，下半世無憂，生活同文化截然唔同都係忍幾年就走得，等收山嘅C朗都係咁諗。只係28歲嘅三獅箭頭艾雲東尼，當打、踢法全面又善射12碼，曾因瘋狂賭波被停賽大半年，之後復出證明仍然有料，大把英超中下游隊爭住要；如今落實投奔沙特，同費明奴、馬列斯重組英超三叉戟，有啲嘥料！三獅歐國盃出局後正處調整期，喺歐國聯B組對3弱旅係最佳練兵機會；卡尼漸過黃金期，東尼同同齡嘅奧尼屈堅斯可爭上位，如今為咗30萬英鎊周薪出走，差唔多自動申報退出三獅，有啲可惜。