Coldplay的選擇
英國天團Coldplay宣布巡唱香港站嘅嘉賓係Marf＠COLLAR。參考返台灣站嘉賓係告五人，日本站係Yoasobi，而南韓就係TWICE。Coldplay每站只會請一位嘉賓，而有別於本地歌手多數搵朋友做演唱會嘉賓，Coldplay每個站嘅嘉賓選擇，其實係代表佢哋認同由呢位歌手向當地粉絲say Hello，分量相當重。亦因而引起熱烈討論︰點解Coldplay會揀Marf？
一片討論中，有啲戥Marf高興，亦有陰謀論話係俾錢買返來。咁就真係太天真，須知道好似Coldplay嘅國際級天團，演唱會利潤係天文數字，點會收錢請嘉賓？而且對佢地來講，聲譽亦比一切重要，嘉賓一定要得到Coldplay認可，絕對係非賣品。我相信每間公司都會大力推薦旗下藝人，但到最後肯定係由Coldplay選擇，認為邊位歌手適合介紹俾佢哋嘅粉絲。
Marf人氣唔係全港最高，但近年由Collar到Marf自己本身，的而且確喺香港獨有嘅存在，有實力、有style、有光芒。Marf 可以話係天生嘅performer，跳唱演都唔只係新人水平；當然仲有嘢要進步，但佢係我見過最實淨嘅一位新人，相信Coldplay揀佢亦係欣賞佢嘅風格同實力。其實之前澳洲小天王Ruel香港站亦係由Marf擔任表演嘉賓，Marf背後團隊一直打緊國際線，由個人曲風、到MV嘅手法、再加上佢本身外形甚至語言能力，都同國際接軌。
喺大家討論點解Coldplay會揀Marf嘅問題時，我留意到主要有兩種質疑。第一係Marf代表唔到香港，覺得唔係譚詠麟、張國榮、四大天王或陳奕迅等呢啲級數嘅藝人就冇資格。另一種質疑係覺得有好多新一代歌手好似MC、林家謙之類等可以揀。我明白大家都有自己嘅人選，但大家要知道以Coldplay嘅地位，請嘉賓嘅考慮唔係要搵最有代表性或最紅，而係邊個風格最接近佢哋，係taste嘅選擇，覺得Marf 值得喺自己場度表演俾大家睇。
香港人嘅討論若集中於夠唔夠班，只識內鬥、口舌之爭，而缺乏世界觀，睇唔到呢個唔係比較嘅問題，而係taste嘅課題，先係今次事件最值得討論嘅地方 。