Anson Lo全英對白以外……
一年一度嘅《香港國際影視展》(FILMART)係各大電影公司「晒冷」嘅機會，不過今年無論係攤位定發布會嘅規模，似乎都不及往年，連新聞都少，完全感受到古天樂年初形容電影界嘅「超級寒冬」。不過原來仍有公司出錢出人搞發布會，仲宣布有新突破。
ViuTV宣布推出以香港為背景嘅英文劇《The Season》，傳媒報道焦點係Anson Lo全劇英語對白。但我睇到套劇仲有好多更值得講嘅位，除咗係荷李活超級班底，卡士亦令人期待，有《太陽召喚》(Shadow and Bone)Jessie Mei-Li、007電影嘅Toby Stephens、木村拓哉個女Koki，本地就有首次拍電視劇嘅林嘉欣，仲有Anson Lo、Marf等參與。
製作費同卡士一樣咁突破，根據報道，《The Season》6集製作費係1,800萬美元，即係平均每集2,400萬港元！早排大家仲質疑ViuTV拍劇每集製作費只有6位數，我問過知情人士話最少都要100萬，所以15集嘅劇其實都講緊過千萬。當然budget永遠唔夠，冇人嫌多。今次去到2,000幾萬拍一集，簡直可以同韓劇及美劇媲美。
咁揼本拍套英文劇，老實講未必係最聰明嘅投資，就算你搵到木村拓哉嚟，香港嘅收視同市場，都未必回到本，買套日劇幾千蚊美金一集，收視分分鐘仲高啲，點解要拎過億港幣拍套英文劇呢？好明顯佢哋睇嘅市場係全球，想推香港劇集同演員出去。當好多人懷緬緊八、九十年代港產片盛世，口講要再次拓展市場，ViuTV今次係拎錢出來做。成功與否係未知之數，但定位上一定係香港少見，有呢個視野同膽量已唔簡單，起碼台前幕後都有機會接觸一啲更闊嘅班底、題材同創作，唔係得個講字。
另一邊廂，ViuTV新一季《全民造星》舉行海選，大排長龍，報道話成千人，有人仲喺外國返來。我其實有啲愕然，唔係話去到第六屆已冇人理咩？或者有時年輕人比我哋更加心水清，只要有機會就會去試，唔知得唔得，但評論最廉價，行動先最實際。
投資千百萬當然唔係小數目，但喺呢個圈嘅年輕人，時間同青春其實更寶貴，佢哋用行動去抓緊每個機會，都值得我哋支持。