陳詠燊(Sunny)執導的《飯戲攻心》，截至周三(9月28日)累積票房已突破4,550萬，成為今年香港票房總收入第二高的華語電影，僅次《明日戰記》。成績如此理想，而且已上映三個星期，但台前幕後依舊每日「踩盡油」走N場謝票。重頭戲是周日(10月2日)下午舉行的「10.2齊人謝票神級答謝大會」，剛於日前完成舞台劇《最後禮物》50場演出的黃子華正式歸位，與陳詠燊和5位拍檔 ── 包括只能以視像方式參與的林明禎 ── 齊齊亮相，與有份入場的真正「忠粉」(報名時需要上載兩張不同場次的票尾)面對面交流。有得睇戲，有得追星，更可以近距離見到「子華神」，對影癡來說可謂相當吸引。
電影公司宣傳上未有放慢腳步，難怪Sunny日前擔任我與阿感(黎國輝)主持的Podcast節目《娛樂導賞精華團》第一季最後一集嘉賓時，也坦言謝票需要動用很多人手：「我哋謝票嗰種謝法係好勁，我自己(就)日日都謝啦，一到禮拜六日直頭兵分三路咁謝㗎。唔係只係(謝票)嗰個人，至少要有三個同事湊一條team，於是成間公司傾巢而出，係爭在做會計嗰個未出嚟，其他都出晒，咩崗位都要出，所以係非常忙。」
陳詠燊：想同自己玩遊戲
難得導演大駕光臨，當然不會講幾句就收工，結果我哋三個傾足100分鐘，話題圍繞《飯戲攻心》一些鮮為人知的花絮外，亦有談到香港電影的現況與將來，而這篇專欄文章只會集中寫「飯戲BTS」(BTS者，Behind The Scenes也)。首先要問的是：何以當初會想開拍一套以圍埋食飯為主的電影？原來是導演想挑戰自己。「真係同自己玩遊戲，都想挑戰一次，都寫咗咁多年(劇本)，有咩最難寫，有咩最想試。係真係因為《Friends》(美劇《老友記》)，我咁鍾意嘅一樣嘢，冇可能唔自己寫一次，就係點樣一間屋六個人，可以變到好好睇嘅戲出嚟。」
他解釋，入行超過20年，連同以往為馬偉豪導演創作的劇本，今次寫的劇本是最學術的一次。「真係設定咗個架構，我用戲劇理論裝嵌出嚟，既然個空間細到咁，入面嘅戲劇矛盾就要比普通戲仲要大，因為冇場景借力，冇得游水遇溺，生死關頭，我冇得遇到恐龍，冇得去邊度見到個夕陽好靚……我唯一可以做嘅就係(將)個drama(推到)最大。」
依靠情節推動劇情，對白必須寫得精煉，不然難以營造張力、牽動情緒。其中一幕最喜歡的是王菀之(飾演Josephine)拒絕陳湛文(飾演「三佬」陳熹)求婚，繼而引致那場「大龍鳳」發生的關鍵一幕，Sunny透露有兩句對白，連同構思劇本，足足花了一年時間才「搞掂」：「我自己非常鍾意呢場戲，但最有趣嘅地方係，佢(王)拒絕嗰幾句對白，我係改咗好多次……用邊幾句去講出嚟，先呈現到佢嗰個諗法呢？係有好多個可能性，我到拍之前再改……跟住返到去剪片，我覺得喺現場寫得未夠好，我覺得點都唔夠中，點都爭一句，但我點都度唔到。終於差唔多到交片，我2021年6月拍啦，拍完之後剪，剪到11月頭要交片，我係臨交片前最後一晚，突然間先俾我度通最重要嗰兩句，跟住我就補對白補返嗰兩句：『原來我個世界可以冇你㗎喎』同埋『我諗我煮到有啲攰喇』，呢兩句係最重要，我係用咗一年時間先諗得通。」
同班底再拍戲
Sunny指出，香港市場太細，跟外國戲相比，本地電影通常不能太長(約90分鐘左右)，靠每天擠出來的時間「排多一場」來增加收入，他說今次幸得有江老闆(江志強)支持，才能夠放任地以120分鐘「埋尾」。「我寫嘅場口扣到好緊，我唔會容許有廢嘅場口」，但因為今次拍得太長，最終要刪走部分情節，張繼聰正是「被犧牲的人」。「坦白講，背景資訊比較少嘅係阿聰，佢俾我剪(走)咗3場(戲)，好慘。因為自己拍長咗，呢個係我對阿聰嘅一個遺憾嚟，仲要嗰幾場佢做得好好，但我唔可以再任性(去)到兩個幾鐘，於是惟有要忍痛做某一啲手術……所以可能第二套戲，喺劇本長度控制，我都要再做好啲。」
有機會推出導演版，將遭刪走的情節重現嗎？Sunny直接說應該不會了，因為會拖慢節奏，對整齣戲而言不是一件好事，反而《飯戲》舞台劇版或者開拍另一套新作，讓原班人馬再次合作就有得諗。「忙咗宣傳先，其實我有諗(過)下嘅，因為我係好鍾意佢哋6個嘅化學作用，我覺得好難得砌到一鋪(靚)牌出嚟，而佢哋中間嘅感情係好到你哋唔信。之前除咗Ivana同阿聰好熟之外，另外(幾位)大家互相唔認識，所以今次好神奇地建立咗一個好有趣嘅化學作用，我係幾想可以延續到嘅。但坦白講自己對劇本有啲要求，我好驚開套續集嚟呃錢，所以真係要度好先，即係就算做返一模一樣我都覺得唔啱數。舞台劇你俾我諗下先，我唔抗拒呢件事，但係要諗，要再度。」