涉事電影公司發聲明，會刪除在INUF所拍的片段。
不止藝人，好多藝人的屋企人都有搞生意，有些更搞得有聲有色，好似徐天佑太太Olive Wong，本身做藝術顧問，因為經常被問用甚麼粉底，所以索性建立了「I Never Use Foundation Breakfast Club我從不上粉早餐會」(簡稱INUF)專頁。起初只是分享護膚美容心得，再慢慢發展成代購，後來更正式推出自家品牌的天然護膚品。
品牌現時有3間分店，其中在中環九如坊的概念店，去年更獲商業室內設計金獎。店舖夠靚，正常諗一定是好事，吸到客嘛，但原來都可以因此搞出不愉快事件。
星期二晚，INUF網上發文表示，早前有電影公司聯絡九如坊店，話想借用場地拍攝一套賀歲片，店舖就回覆租場費用需要逐小時計，以及如有任何損毁須由電影公司負責。然後電影公司就答整個拍攝「只係演員入嚟兜幾個圈好快就出返去」，不會有工作人員進入店內，而店舖重申這樣也要付一小時費用後，雙方就未有討論下去。
直到出post當日，INUF員工發現店外有攝製隊set機後，便走出去向對方講明店內不可拍攝，豈料轉個頭即有工作人員走入店內放低對講機，然後兩位演員又入室內聽對講機指令演戲兼大聲講對白。「係，成件事其實只係短短10分鐘，但呢10分鐘嘅『夾硬嚟』同強姦其實冇分別」，而INUF亦有在帖文中開名，指涉事電影公司是本地製作有限公司。
只要在Google輕輕搵搵，自然會搵到本地製作是資深電影人「雄叔叔」伍健雄創辦，現正拍攝由蔡卓妍、張繼聰主演的《賭鑊金》(暫名)，伍健雄本人亦擔任電影監製。九十年代初入行的伍健雄，一定有經歷過黑幫入侵影圈的那些年，那時候黑社會完全毫無道義、規矩，既會打劫底片，又會持槍逼人接拍電影，收完保護費又會再收保護費，一齣電影由開戲到上映認真要歷盡九九八十一難，搞到演藝界忍無可忍發起遊行抗議。明明做過受害者，又知道守規矩好緊要，今時今日卻學人監人賴厚做「縮縮」，只為慳那幾千蚊租場錢，實在肉酸到極。
可能這就是此圈的本質？好記得之前張婉婷上電台節目時，好得戚自爆拍《給十九歲的我》期間，在沒有准許證的情況下，「偷雞」入日本單車賽場做採訪：「我哋好威武咁，扮晒有permit咁入去」。結果「被出鏡」的「牛下女車神」李慧詩便炮轟張導，而體育記者協會亦斥她影響傳媒形象。好在現在資訊發達，多了平台發表睇法，吃了虧不會啞忍。如果今次INUF沒有開聲投訴，「雄叔叔」肯定會繼續搵方法做「縮縮」，到時實有其他仁兄中招。