上周二(11月29日)，一場矚目大戰於電視「上演」：「狂牛」袁天就(駱振偉飾)與「亞洲拳王」井澤魂(王智德飾)在擂台上一較高下，可惜這場強強對戰最終以悲劇收場，大師兄遭對方重擊後傷重身亡。事後駱振偉(Thor)在自己的Facebook專頁和Instagram發帖文，劇迷隨即蜂擁而至，留言「悼念」大師兄，令兩邊帖文皆獲逾萬人點讚。
事實上，自《繩角》播出以來，袁天就/駱振偉的討論度絕不遜於AK和Lokman，有網民坦言有眼不識泰山，從不知道原來Thor拍劇可以演得那麼好，而其Instagram粉絲數目亦在過去一個月內暴升過萬，至截稿前(12月8日傍晚6時)已升至接近4.6萬。與駱振偉相識六年，見證他不斷成長，今次總算可以語氣肯定的說：科科你終於都有代表作喇！
歌唱比賽奪獎 惟出道失敗
說來有趣，當初留意駱振偉這個人，源於2016年10月在99台播出、一個包含真人騷元素的旅遊節目《Begin Again異鄉再出道》。其中一集，他在倫敦跟歌唱老師Nina Kristofferson上堂，重新接觸唱歌專業，唱着唱着，因為一些埋藏在心底的悲痛 ── 參加英皇新秀歌唱大賽奪金咪大獎和得到歌手合約，惟最終出道失敗兼解約，自覺有愧於歌唱老師梁月玲──一時感觸，男人老狗在鏡頭前嚎哭。六年後，Thor憑演繹袁天就獲得外界認同，而《繩角》監製盧思麟(Tommy)，正是《Begin Again異鄉再出道》其中一位監製，所以Thor與大師兄的「緣分」，絕非上天失驚無神恭喜你，而是六年前開始慢慢交織，延綿至今。
就在大師兄「畢業」後的30小時，上周四(12月1日)的凌晨4點半，收到Thor兩則「超長氣」的WhatsApp語音訊息，非常認真回答我的問題。他說當初是監製Tommy與導演羅俊偉(Tony)主動邀請他飾演袁天就。
「Casting(試鏡)呢個真係冇，因為已經合作過，我都拍過佢哋導演(執導)或者製作嘅劇集，所以佢地都幾認識我。你問，袁天就呢個角色同我似唔似，其實最初監製點解搵我，佢就係話，寫完呢個角色之後就係諗起我，可能因為我同佢識咗好耐，佢都知我脾性。我喺其他訪問都有提過，(袁天就)係以Kobe Byrant(高比拜仁)為(創作)藍本嘅一個拳手，即係Kobe嘅Mentality(思維)係對自己好harsh；可能監製就係知，我係一個對自己好嚴苛嘅人，亦都好硬頸，為咗進步會付出好多。唔係讚自己，即係個性格(是這樣)，有啲工作狂或者(追求)完美主義，有時真係會跌咗落個陷阱度。我唔係好識得接受，或者處理人哋嘅讚賞，譬如拍攝所有嘢，好多時候出街睇返，都會覺得自己做得唔夠好，所以當監製搵我，就係睇中咗我呢樣嘢，所以袁天就呢個角色，的確有好多地方係同我好相似，我喺工作上係一個咁嘅人，而我返到屋企之後，都係一個小男人，啲碗都係我洗嘅。」
角色找到37歲的我
對於今次演繹大師兄而人氣急升，Thor坦言從沒想過外界反應如此熱烈。「我從來都唔敢諗㗎呢啲嘢。你上次訪問我(2020年)都有講，我唔係一個好有觀眾緣嘅藝人，所以好多時唔會諗啲觀眾會點睇，反而我準備得最多嘅係點樣唔好失禮個角色，我覺得(今次)出到嚟個效果咁好，係因為呢個角色真係寫得好好。而我最感動嘅就係，我可以令觀眾相信我演繹嘅袁天就，作為一個演員，我覺得好開心好感動，因為呢個就係我最想做到嘅效果。我都有同太太講，觀眾喜愛嘅係袁天就，大家忘記咗飾演袁天就係駱振偉，對我嚟講，咁樣已經係最高興。」
入行15年才遇到袁天就這個角色，到底是時機問題抑或能力問題？Thor這樣回答：「我覺得喺演藝圈最難玩嘅遊戲就係，你行運嘅時候，係你嘅努力俾人見到……(因為)你努力咗但冇人睇到，呢個係佔大部分時間，再慘啲嘅係，你努力咗，出到嚟嘅效果係opposite(相反)。我從來都好相信：『慢慢來，比較快。』努力係一定會有人睇到，而努力學到嘅嘢，或者你付出嘅嘢，點都有用……講真，早幾年，你又唔會搵我做袁天就啦，係咪？我都handle唔到大師兄呢個角色，但就喺我37歲嘅時候遇到佢(角色)，可能就係我人生經歷咗好多起起跌跌之後，結埋婚喇(2019年)，去演繹呢個角色先處理得好囉。所以(以往)盡咗力，但遇唔到(機會)都冇辦法，我諗成個行嘅人都係諗緊呢樣嘢，每個人都有呢種struggle，呢行係好難(行)㗎，我從來覺得做幕前嘅人係好痛苦，或者好大掙扎，所以我真係希望，觀眾睇我哋作品(演出)嘅時候，唔好咁harsh啦，其實每一個做幕前表演嘅人都想做得好，但有時真係可能失手，做得唔好。但係唔係每個人都可以一步成名，唔係每個人都可以一步登天，可能係要慢慢儲經驗，可能有一日就會做得好啲。」
更正啟事：11月25日本欄刊登的《2023金像獎「打大交」》一文，尾段提到最佳新演員「爭崩頭」時，其中一句寫「盧瀚霆入圍機會很大」實為資料錯誤，他擔正的第一套電影《假冒女團》於2021年11月上映，按照2022年舉行的「第40屆金像獎」評審標準，他已獲得當屆最佳新演員的參選資格，謹此更正及致歉。