溫拿成立50年，算是boy band始祖。
2023年，溫拿走到第50個年頭。相隔半世紀嘅男團MIRROR，會有呢一日嗎？
筆者綜合娛樂界耳語，推斷可能性低過零，直接講原因驚犯「鏡安法」，不如分享三個觀察。
一：點解MIRROR嘅行程會咁透明？我識MIRROR公司嘅人，佢哋話好多時街外人比公司內部更清楚佢哋嘅行程。咁點解呢？知佢哋行程嘅，不外乎3類人——自己嘅工作人員，個job嘅工作人員(例如拍電影咁crew咪知囉)，同埋，藝人本身。以上三者邊個漏/放/賣料？我唔知，只知MIRROR不合理嘅行程透明度，反映一件事——有人唔專業。
MIRROR 12子要維持組合長久，真的要學溫拿。
二：四大天王年代，各人來自不同唱片公司，鬥係正常，合作就有驚喜。而家12個人既係隊友，又係競爭對手。MV每人出幾多秒，全個世界幫你計住；出多啲solo又被人比較又被人話冇團魂，唔出solo或者出慢啲？偏心囉！放棄囉！Solo同團呢個平衡，就算佢哋12個真係好兄弟唔計較，個世界一樣幫你比較。最慘係佢哋一開始唔係賣靚仔咁簡單，佢哋係賣緊夢想努力團結兄弟情，所以個團魂其實係一樣不能破嘅core value，但現實係十二隻手指點只長短之爭，直情係銅鑼灣漢堡大戰粉紅摩天輪。太多平衡要做，即係無可能平衡。
三：呢點係最最最緊要嘅，就係由MIRROR到公司再到個社會，全部都太感情用事。理智少少嘅都唔會做隊12人組合，出次trip廿幾三十張機票、廿間房； 有電影公司朋友同我講，要MIRROR成員去謝票要6位數字，但唔係artist或者公司袋，係用黎請保安，梳頭化妝等等。呢個係先天性結構問題，全因當年唔想放棄12位任何一位。有感情唔係唔好，不過，睇下前輩溫拿，人地要開演唱會先聚首一堂，平時各有各做，心無雜念。
所以結論係：點會長久？要長久，就唔好又團魂又夢想又兄弟又呢又路12糾纏。
要長久，學下AKB，唔好講感情講數字，邊個成員多粉絲買佢隻碟就邊個出多啲solo。純粹理性，自然長久。