MIRROR同COLLAR究竟係咪同公司？
COLLAR最近推出EP，一次過出4首新歌，綜合網上反應，唔止「領粉」受落，連路人都讚。唔少人覺得由音樂到MV製作，以至COLLAR最近喺西九嘅表演，甚至演唱會一系列動作，除咗反映公司「抌本」，仲有planning，同時讚背後團隊做得唔錯。
芸芸稱讚中，有鏡粉慨嘆「原來佢哋公司係識planning㗎？點解MIRROR又爭咁遠呢？」明明同一間公司，粉絲就覺得兩隊人有以下幾點差別，等我同大家分析下︰
一/ 公司大細超：分別係指資源同心機，有少量鏡粉投訴公司將資源俾晒COLLAR。我笑咗出聲，相信任何人都睇得出，投放於MIRROR嘅人力物力肯定係COLLAR嘅數倍以上，所以我覺得呢點純粹發洩。
二/ 團隊唔同：有人話COLLAR同MIRROR經理人唔同，當然有唔同諗法以及優點缺點。呢個差別邏輯上成立，但我就唔肯定有幾大影響，畢竟MIRROR早幾年團體同個人成績都唔錯，冇理由成個團隊突然間唔識做。
三/ 個人vs團隊策略：有人認為MIRROR主打個人而輕團隊發展，COLLAR就恰恰相反。當然亦有網民覺得，MIRROR 12個仔，好多時一連出幾首歌，舞台劇、電影、拍劇又演唱會咁，365日都做唔完，COLLAR之所以做到今次EP嘅好成績，係佢哋幾乎閉關半年嘅成果，試吓MIRROR閉關半年，鏡粉一定鬧。
以上三點有個共通點，就係將藝人嘅成敗，全部歸咎於外在因素，公司嘅策略、背後嘅團隊，藝人似乎冇責任，我知以下我講嘅對好多忠粉都好逆耳，其實我覺得兩隊最大嘅分別係第四點：
四/ 兩隊人最大嘅差異其實係藝人本身，兩隊唔同嘅人、唔同嘅組合，佢哋嘅意願、選擇、性格都有好大分別。正正亦因為兩隊人來自同一間公司，更反映自身因素先係兩隊人有差異嘅主因。就好似兩兄弟明明喺同一個家庭長大，但就會有唔同嘅發展，就係因為自身嘅性格同選擇唔同，與其歸咎外在因素，點解唔思考下個人嘅修為，先係導致有唔同結果嘅根本原因呢？