MIRROR嘅AK憑電視劇《打天下2》喺釜山國際影展捧走今年的「年度新星」。獲提名嘅全部都係亞洲有實力嘅演員，作品亦都好高質素，AK可以跑出，獲肯定係rising star，爭氣之餘，亦可以分析到MIRROR嘅海外部署。
第一點：平台線。AK嘅年度新星獎係來自《2024亞洲內容暨全球OTT大獎》，香港人認識《打天下2》係透過ViuTV，但其實佢哋嘅劇仲會放上OTT平台，亦即係大家稱呼嘅「黃Viu」，喺東南亞部分地區同Netflix有得揮，聽講仲超越咗Disney+同Amazon。大家都知道「藍Viu」孕育咗MIRROR，但比較少人知道黃Viu係幫佢哋衝出香港。黃Viu全球有成超過6千萬用戶，係香港市場嘅10倍咁濟，加上有好多係韓劇，女性觀眾應該比較多，有利MIRROR發展，而黃Viu亦做好多泰國、印尼、菲律賓等劇集，呢點就帶到第二個分析，就係製作方面可以更加國際 。
第二點：製作線。MIRROR小組歌《Strawberry Love》去泰國拍MV，都有鳴謝黃Viu，聽講製作團隊包括泰國人，地頭蟲可以幫到佢哋去唔同地方拍攝更加有水準嘅嘢，肯定好過只靠香港團隊去唔同地方拍攝，仲可以有兩地團隊合作嘅火花，又有協同效應，成個作品嘅質素係另一個層次。
第三點：宣傳線。自家平台同製作之餘，MIRROR亦一直都同好多海外單位合作，如日本音樂頻道「THE FIRST TAKE」、同NBA球星合唱、上CNN訪問，連睇NBA都被官方IG發帖歡迎，再加埋無數嘅國際時裝周、傳媒訪問等，都係全方位咁俾佢哋嘗試緊唔同嘢，據聞公司嚟緊仲會安排部分成員參與香港以外嘅電影電視㖭。
八、九十年代，香港文化強勢，港產片同廣東歌做到香港紅就會喺亞洲紅，但今時今日即使做到香港頂流，都仲要用好多方法先有機會衝出香港，即使有平台、製作同宣傳三管齊下，亦都唔係咁易成功。但係MIRROR似乎全方位咁努力緊，或者就係延續緊《全民造星》嘅精神「將燭光變曙光再發光」。