延續上期話題，喺平靜嘅game界最近仍然係《Bravely Default II》嘅天下，中、外遊戲網站都出咗唔少好評，亦係遊戲熱棒嘅主因。而本地後勁都幾凌厲，聽啲老友講，上期出完稿後，第二轉貨也早早賣完。隻game土下座就已經玩咗幾十個鐘，可以同大家分享下點解隻game咁勁。首先遊戲係隻非常「王道」嘅JRPG，王道到你直情需要刻意行地圖練功，並且要研究唔同職業嘅技能，有玩《Final Fantasy 3》嘅感覺，但當然遊戲進步，呢隻game系統就更為複雜，如職業可分主、副，白魔法師+黑魔法師係一個玩法；盜賊+賭徒又係一個玩法，成隻game有超過20種職業，淨係咁已夠有排玩。另外又有稱為「BP」嘅行動點數，可以俾你決定要用晒BP同一回合郁幾次，抑或儲BP留力等機會反攻，對於傳統上「你打我一下，我打返你一下」嘅JRPG嚟講，多咗一種戰略味道。不過缺點亦非常明顯，首先遊戲劇本「王道」到接近冇驚喜，理所當然嘅發展同明確嘅敵人，令劇情唔夠令人回味嘅元素。此外遊戲對支線任務嘅理解仍然跟不上時代，唔係行地圖收集物品，就係殺幾多隻怪物，設計非常乏味。不過整體嚟講，遊戲性絕對係足夠令人重新愛上JRPG。