呢期話題最強，必定係《最後生還者二部曲》，但與其執口水尾(畢竟成個星期啦)，土下座寧願再推隻最近比較「冷門」嘅遊戲，就係Switch上推出嘅SLG《幻想大陸戰記：盧納基亞傳說》喇！
講歷史，本身系列誕生於20年前PS時代，銷量平平，遊戲質素還好，但未稱得上係絕佳，所以就再無續集，但「估計」又係後來大陸出現呢隻Game嘅老翻漢化ISO，於是喺中文遊戲物以罕為貴嘅情況下，變成咗部分網民口中「神作」。
《幻》呢隻遊戲，其實係類似簡單版嘅《三國志》玩法，扮演君主搶奪天下，有六大勢力自選，各有不同劇情同角色，角色係會帶領怪物軍團作戰。而今次最大亮點，係有著名畫師風間雷太做美術人設，畫面超靚，又繼承到舊作嘅優點，除咗有原創嘅完整世界觀外，就係有數之不盡嘅劇情。另外角色、怪物本身都有裝備及可以轉職，路線非常多樣化，極富玩味。至於缺點其實都係同以往一樣，就係遊戲操作仍未夠成熟，玩家需要喺內政時不斷重複類似指令，當後期城池、角色變多，就會覺得煩厭。再者雖然遊戲想大家打仗前睇清地形，再決定出戰部隊，但講到底只要有一兩隊夠強嘅主力隊伍，基本就足夠打天下。呢啲都係小問題，只要你喜歡日式「爬格仔」SLG，一開始玩就好難停到手，絕對係個人推薦必玩！