唔認老都唔得，講起《夢幻模擬戰(Langrisser)》，你可能會即刻諗起最近一隻好似人人都玩緊嘅手遊，但土下座諗到嘅，係漫畫家漆原智志筆下一大班性感到有啲踩界嘅女性角色，如果你同我一樣，咁大家有計傾啦！試問我又點估到一隻由超任年代只響少數社群大熱嘅SLG，去到今時今日竟然都仲有魅力引到新玩家？
《夢幻模擬戰》嘅手遊版，唔只遊戲名用返當年日本翻譯搞出嚟嘅誤解(呢5個字只係遊戲封面上嘅文本說明，原名Langrisser先係主題，即係把聖劍！)，而且仲冇改到一早out晒嘅戰略玩法，咩兵種相剋、角色轉職等，你以為唔適合手機平台嘅元素，反而統統成為賣點，玩家勁buy！仲厲害到試過贏咗《天堂M》成為一日營收冠軍！莫非真係無腦手遊太多嘅結果？