同事們，其中一班在萬勝節扮The Simpsons。
那天跟同事聊著，竟然又聊起一單往事。我告訴同事，當年我雖仍算「新入行」，但新還新都好似做了一兩年了，人工還是好低。有一次跟上司在會議間說起，我弟弟現在也入行做廣告了，上司開玩笑：「嘩，你細佬搵得多過你喎！嘿嘿。」
我覺得自己人工真的「毫無起色」，相信很易一直廉價下去。有一天，我終於鼓起勇氣，約見上司希望爭取或者改變甚麼。我從來都是這一派，有甚麼就禮貌地爭取；有另外一派叫「算啦，要出聲爭取就冇意思啦」我是頗反對的，人家又不是你肚裡的蟲，有甚麼就說出來嘛。
見到上司，我直接跟他說了人工問題。然後我幾大膽，我「禮貌地責備」我上司(嗱，責備唔代表冇禮貌喎，內容係責備，但我係禮貌地表達)。「唔知你記唔記得，你上次同我開咗個玩笑。」然後我將上司笑我弟弟應該賺得比我多這件事憶述出來。「我細佬搵得多過我，你竟然覺得好好笑，你係我上司，你唔係應該覺得羞恥咩？你係應該諗，點解呢個行業會咁？係咪有咩問題？而就算你冇能力改變呢個行業或者呢個問題，你唔應該係笑我嗰個。」都差不多廿年前的事了，只能記得大意如此，當時應該沒這樣言簡意賅，大概是一吞一吐慢慢表達，不過我100%肯定記得的是，當時我流著眼淚。
上司聽完我說的。「對唔住。我為自己呢個玩笑道歉。」人誰無過，哪怕是上司，有能力同時有能力道歉的上司，其實也是很難得，所以我其實很敬佩他；而我都知道他人品好，不是那種「聽完我呻只會諗點樣反擊」的人，之所以我才直白地向他「申訴」。人工最後有冇加，不是這事的重點；而這件事我沒放在心，但一直記得，起碼於我來說，讓我時時警惕自己，「有啲笑呢，唔可以講；有啲笑呢，做上司唔可以講。」一開始時我話我是跟現在的同事聊，我就是想告訴他：「你大個仔㗎喇，大哥哥唔係純粹年齡上嘅分別，你要知道幾時講咩，更重要係，有啲咩你而家唔講得。」