今年旅發局「建行（亞洲）香港美酒佳餚巡禮」由本周四起(10月25日)一連4日於中環海濱活動空間舉行，適逢活動10歲生日，特別安排100架無人機每晚於維港夜空表演，以無人機璀璨燈光砌出多款圖案，例如「10」字樣、生日蛋糕及酒杯等，可以話係第一次，夠晒新鮮感。
據旅發局老友話，今次由新加坡無人機表演公司Sky Magic負責，每次表演長達7分鐘，並且已經事先攞晒相關部門審批，仲提醒於表演期間，公眾切勿未經申請便在附近操作無人機，以免造成危險。
另外，近期Viu TV「全民造星」大熱偶像亦會於10月27日現身表演，包括姜濤、Lokman、Anson Lo、Ian及Anson Kong，而人氣表演嘉賓仲有JW王灝兒、RubberBand、Dear Jane等，各有粉絲，陣容鼎盛。