家陣智能科技幾乎乜都做得到，仲為企業節省成本。Ray昨日去AirAisa香港10周年的傳媒聚餐，聽佢哋集團港澳地區行政總裁 劉小媛 (Celia)講，依家佢哋已經試用面部辨識系統，方便乘客喺登機閘口唔使排長龍，等職員逐個check登機證，只要經過閘門，大約10秒就認得出你係咪搭呢班機，佢話真係慳好多時間㗎！
劉小媛 (Celia)
當然，慳咗嘅時間唔止對乘客有利，對公司都有成本效益。Celia話，佢哋嘅航班turn-around目標係25分鐘，依家喺香港就大概要35分鐘，而佢哋喺馬來西亞新山機場試行呢套系統後，就已經達到目標，皆因辨識率暫時達到100%，所以佢話希望可以將呢套系統引入其他航站，包括香港。
每程慳咗10分鐘，慳慳埋埋真係對航空公司有利嘅，但Ray同行家都關心私隱問題，Celia就話佢哋有自己嘅IT團隊同埋server，作為航空公司以安全為首要，所以佢哋都將呢套意識放喺保障私隱方面。至於儲蓄嘅數據將來有咩用途呢？公司最近創立咗飛機餐品牌，將來又會開餐廳，大數據用途，可以好廣泛喎！