大部份More 女喺揀衫顏色方面，都係名符其實嘅黑色控，除咗因為覺得黑色可以顯瘦外，亦因為懶得花心思左配右搭，選擇黑色一定唔會錯，貪其容易配襯，加上因為係深色，質地就算差啲都唔覺，又唔容易弄髒，總之好處多的數唔晒。但係其實只要款式剪裁及布料配合得好，好多顏色，甚至係白色都可以著得好瘦。好多人唔知道，其實亞洲人皮膚非常適合綠色，顯瘦同時高貴大方，較著黑色更加精神年輕。所以，綠色亦係我最近最愛嘅顏色。
剪裁方面，好多人都認為著得寬鬆點，包得密實點，上衣長身點，就可以遮掩肚腩及下圍，但其實只要布料好，收身剪裁嘅衣服更能顯瘦，因為身形係睇比例，而唔係數值，上圍、腰圍同下圍只要比例恰當，就唔覺肥，相反更加顯得身材好。有時上衣較短，怕會突顯大肚腩，但高腰較幼，只要配合高腰半截A字裙或裙褲，便可將腰顯得比較幼，而且衫短褲長會令雙腿顯得較長短腳。
今年夏天，露肩露膊荷葉形上衣仍然係大熱，有時適量嘅露肩露膊比包到實更能顯瘦，因為更有層次。但要鼓起勇氣改變一直以來嘅著衫習慣並不容易，或者可以嘗試踏出第一步，由顏色開始著手，畢竟夏天來了，色彩光鮮嘅衣著可令人心情更愉快，顯得更精神。大家不妨可以考慮一下。
(照片由作者提供)
