最近重遇了個大學同學。畢業後，我們就很少見面了。對上一次見面，也差不多是十年前了。
同學跟我一樣，結了婚，生了孩子。聽他所講，家庭也挺美滿的。同學也有份待遇不差的銀行工，有事業有家庭，人生如此，夫復何求。
「CK，我其實好羨慕你呀……」傻的嗎？我有甚麼好羨慕？「你睇我好似樣樣好，但返工返咗十幾年，其實好悶呀。一諗起，往後嗰二十年都係繼續打份工，就覺好冇意思。」
「幾十歲人仲嫌返工唔好玩？你冇嘢呀？」我笑說。
「老細，你有自己生意，工作可以自己話事，我呢種奄悶到生不如死嘅感覺，你唔會明㗎啦。」朋友仰天長嘯：「我呀，三十歲嗰陣曾經都好接近出嚟創業，如果嗰陣勇敢啲走出嚟，可能就唔會好似依家咁，做一條冇夢想冇鬥志嘅鹹魚啦。」
我心諗，你估創業實得㗎咩。一將功成萬骨枯，每年有幾多創業的人敗走收場，你又知多少？不過我還是好奇問：「咁你當年做乜縮沙呢？」
「結婚嘛……嗰次你都有份嚟飲啦……」同學說：「本來都諗住出嚟搏吓，但跟住同女朋友傾吓傾吓，覺得結婚要使好多錢，結婚初期都係應該唔好咁搏，儲多個錢，生活穩定咗先出嚟再搏……」
「哦……明白。」我點了點頭。
「過咗幾年……又有人搵我出嚟做生意啦……」同學說：「個idea仲幾好添㗎！」
「OK，咁點解你又縮多次沙呢？」我問。
「生仔囉。生不逢時呀，人地搵我埋班冇耐，我就發現我搞大咗老婆個肚。」同學說：「咁嘅形勢，邊敢出嚟搏呀？」
結婚生仔係要用錢，不過如果你真的決心夠，這些原因恐怕都是阻不了你的。講到尾，就是決心不足吧。當然，老婆是否支持，也是重點。
「其實最近都有人問我出唔出嚟搞生意……」
「你婚又結咗，仔又生埋，生活穩定到一個點，你呢次冇理由推啦啩……」我開始按捺不住了。
「唔啦，幾十歲人啦。你睇我吖，喺銀行裡面，年資高人工又高，我怕如果我辭咗份工，到時如果檔生意唔掂，返轉頭想搵返份好似依家咁嘅工，搵唔返呀。CK，你估我哋仲細咩……」
聽完，我幾乎想一拳車落佢度。人生有很多事情，總是要承受一點風險的。要零風險又有回報？邊有這樣筍的事？同學不是生不逢時，不是時不我與，只是他不斷幻想，人生會出現一個perfect moment去讓他創業而已。會不會出現？他也許可以繼續等，但我相信，人生大部分的所謂機遇，其實都是now or never的抉擇，過了，就真的再沒有了。往後如果要後悔，也只能怨自己。