Throw個靚back先。一年一度荷包出血日(即係聖誕節)，助手常威安排咗位於上環嘅法國餐廳Bonheur。好在佢醒目，一個月前訂咗枱，所以安排到間VIP房，可以靜啲啲。(外面有枱飲到好high嘅uncle auntie叫囂lol，但明嘅，聖誕節嘛)
雖然係法國餐，但侍應清一色本地薑(老實講咁樣食得仲自在，唔使下下轉channel)，貼心有禮貌，完全為間餐廳加晒分！
入返主題先，平日嘅dinner menu價錢雖然五百幾蚊起跳，但我覺得價位合理。餐廳選用嘅食材夠新鮮，由擺盤到烹調都落足心思。侍應殷勤嘅服務同對菜式專業嘅介紹，再為呢餐晚飯錦上添花。每一道菜都好食得令人感動，實在太耐冇食過喺冇星星包袱下嘅高質法國菜。難得地唔係用魚子醬鵝肝等等去堆砌menu再夾硬賣到貴一貴(市面上實在太多呢啲餐廳)，食材配搭得宜又唔會搶去食物本身嘅味道。特別推介佢個Grilled Kuro Butta Pork Rack，不要問，只要信。
Bonheur 上環文咸東街22-26號柏廷坊6樓