昔日港島每個角落，都會見到忌廉配湖水藍色澤，不論於東區繁華鬧市，或轉入南區怡人景致，海邊幽曲山路，大街小巷或上斜落隧道，伴隨市民汗馬功勞的，總有中華巴士。
講起簡稱中巴嘅China Motor Bus，當然想起巴士之父顏成坤先生。老一輩嘅港島人，經歷過香港急速起飛嘅黃金年代。正當未有地鐵港島綫之前，大型運輸交通有賴電車及中巴承擔。而由戰後嘅英國二手車翻新、底盤加長又變短、單層改建雙層、引入後置引擎車種，甚至淘汰售票制度，以司機一人模式運作及乳膠座椅等，都見中巴進取嘅精神，尤其相傳由顏先生提出嘅12米三軸巴士，更加獨具慧眼，改變香港嘅陸上交通。
帶領巴士服務
顏先生於1920年開始接手家族人力車業務，有見九龍汽車(九巴)和啟德客車於1921和1923年成立，於是決定與黃耀南一同創立中華汽車，一同競爭於九龍及新界地區，其後港府在1933年設立巴士專營權，而中巴遷到港島服務，取代原有之香港大酒店巴士公司、香港電車有限公司和香港仔街坊福利會公共汽車公司，直至海底隧道通車才再次踏足九龍。不過為免與對岸九巴車隊混亂，多番嘗試之下將下半紅色車身改為上杏下藍，同樣內部原本嘅淺灰亦同被藍色替代。
講開車隊，不得不提建成於1976年有如基地嘅車廠，細數中巴舊日多個車廠，也不及位於柴灣嘅極具標誌，乃因此為中華巴士總辦事處所在地點，亦係大部分中巴裝嵌及維修嘅誕生產房。無奈1998年8月專營權屆滿，連同昔日車出車入嘅熱鬧，伴隨外牆漆油脫落消失一樣，剩下冷清嘅寧靜。
見證巴士王國
接近四十年嘅柴灣車廠，其多層式設計可容納450部雙層巴士，失去專營權後仍保留天台作頂層總辦事處及三樓為停車場，其餘則曾分別先後租予新巴、城巴、屈臣氏蒸餾水、仁孚車行及大巴士。而首次登記於1949年，曾領車牌4943及HK104鎮廠之寶古董巴士Tilling-Stevens嘅長陣Express，其於1975年修復後便一直收藏在車廠內，密不可分，總叫巴士公司不至沒有巴士。
其實早於1962年掛牌上市的中華汽車有限公司，雖然在七、八十年代全盛時期曾擁有過百條巴士路線、過千輛巴士，可惜因為地鐵港島線之興建，和香港主權問題顯出中巴改變了，變成迎難退縮保守作風。加上之後多次勞資雙方談判破裂所引發之大規模工潮罷駛，均叫「巴士王國」面臨倒台。不過正正中巴所擁有嘅車廠和員工宿舍土地，叫專營權喪失之前，收益大比例已來自地產項目，反而專利巴士本業盈利只佔總收益1/4左右，漸漸趨向以地產為核心業務。
撇棄巴士味道
這佔地約16萬方呎嘅王國代表，像過去多年其他車廠重建一樣，中巴繼續與太古地產共同發展。彷彿給予香港人又一個示範，專營與本業都不及地產重要。至於辛苦保留下來同為一代標誌嘅Tilling-Stevens「白水箱」巴士，同樣亦已於2015年不能續牌，若再保留唔知將來所放之地又值幾錢？！
