晃記餅家 氹仔舊城區官也街14號
去旅行買手信是常識吧！一係你就唔好post相，如果唔係你試下唔帶啲手信返公司，同事實俾說話你聽(頭盔mode：我啲同事好好㗎，唔會問到你尷尬)！那怕你只係過個大海，點都要買啲手信嘅！嗱！我一直覺得，用身份證過咗關就當旅行㗎喇！
澳門手信嚟講，每次都會幫襯晃記，鹹香厚實嘅肉切酥，每日下晝就賣晒，想話瞓晏少少都買唔到。就算有貨，都打晒蛇餅，要排足15分鐘先買到。雖然咁多人幫襯，做到冇停手，但店員依舊笑面迎人，問乜答乜。即使後面排幾長龍都好，都會落力介紹產品，唔會擺出一副「咪阻住做生意啦」嘅口吻。開業多年，堅持以人手製作餅食，只此一家，keep住個質素。
另一間冇乜人提起嘅楚留香餅家，店舖位置遠離一般旅客區，由一對老夫婦經營，同樣以全人手製作。薄脆且充滿蛋香嘅蛋卷，全出自老伯伯一對巧手。驟眼睇伯伯已經年屆90左右，一直默默低頭工作；sell嗰部分交由太太負責，抵讚位係一啲都唔hard sell，唔會好似連鎖手信店啲大媽咁夾硬塞啲手信落個籃侷你買咁討厭！抱住「至緊要買得開心」嘅心態，老太太臨走仲半逼半推咁請你食由伯伯新鮮捲起嘅蛋卷，噓寒問暖，窩心到不得了！不過要留意，佢哋唔想成為景點，如果只係為打卡影相又唔係真心幫襯嘅話，唔該自律！唔好影響佢哋嘅生活，亦唔好影衰香港人。
楚留香餅家 氹仔施督憲正街300號泉榮閣A舖