曾幾何時，在我純真的認知裡，電影只分兩類：港產片和西片。
這兩個(不存在對立的)概念，「西片」相對易明——Yes，就是由西人做的。西人講的自然是英文(當時年紀小，以為英文就是唯一的外語)。
至於「港產片」，就是裡頭所有人都會講廣東話的片——甚至連西人都會在事後被配上廣東話。「港產片」中那個「產」字我沒有深究，只以為是香港出資生產(其實資金也可以由其他地方的人提供)。
無論點，我的確曾經用語言作為電影分類，但重點是，語言從來都不決定我睇唔睇一齣戲。就算《未來戰士》嗰隻T-800是操純正流利廣東話，不講「I’ll Be Back」而講「我會返嚟」，我都會照睇。入場，是為了細賞占士金馬倫怎樣用B片Budget用心地拍了一齣劃時代科幻驚慄片，而不是細聽一班西人的美式英語。而家不是睇戲學英文。
港產片和西片，曾經平起平坐各有捧場客。上世紀九十年代中，港產片開始被視為次等，入場去睇是對自己的一種侮辱；也有種觀念開始形成：反正都是俾一樣的金額，當然是睇西片，原因是：先不理好唔好睇，但最Cheap的西片，成本都隨時高過一齣所謂高質素港產片。從經濟學的觀點看，用同一筆錢就可以得到更多嘅嘢，自然抵好多啦笨。我有讀Econ，但可能因為成績太差，以致從來不懂得動用經濟學去看待睇戲這回事。我依然有睇港產片，對我來說，入場睇《生化壽屍》所得到的亢奮，竟然比起睇《鐵達尼號》高出N倍(即使後者成本比前者高上N倍)。亢奮，不能量化，同成本不構成正比。
到了現在，我認為，用「香港電影」代替「港產片」會更準確貼切。
「香港電影」已變成一個複雜概念。是否片裡角色都猛講廣東話就是100%「香港電影」(但某些演員明明唔識講廣東話)？是否只要由香港導演執導兼有唔少香港演員做戲俾你睇的，就必然符合「香港電影」這概念？
我不知道，而只知道，當一種語言竟能被渲染成一齣電影的最大賣點，成為睇一齣電影的最大(及唯一)理由，實在Very大鑊，因為電影動用的語言已大於電影本身——語言，可以是一種立場宣示，也可以變成一種(虛偽的)宣傳策略。
我不認為「香港電影」大晒，即使拍到成齣垃圾都死要去撐，因為好睇的電影應該不受制於語言。
只是我實在頂唔順有啲小丑，自己當日明明因為拍港產片(又或香港電影，總之都是在香港取景&講廣東話啦)而紅咗，好多年之後就大義凛然衝出嚟話香港電影已經不再存在，這樣否定過去，未免太識Do了吧。而偏偏他的名字，曾經叫做「港生」。
我們未必下下都要將香港電影等同貞操咁寶貴，但做人，講到尾還是要有氣節的。