瑪花係我哋公司個接線生，返朝九晚五，但係佢大多數時間唔係接電話，而係八卦其他人嘅嘢，好明顯，佢係個全職八婆。瑪花話細個俾車撞倒，有個八婆輸咗血俾佢，咁佢身體就有咗八婆嘅異能。嘩，劇情同蜘蛛俠有得fight？
一個八婆，係比一般人精神更集中，例如當佢聽緊同事講八卦嘢，即使係電話響，佢都唔會分心去接！佢話如果對方有重要事，應該會再call，今次接唔到佢條線，下次都會接到！如果佢唔再打嚟咪即係唔重要啦，唔重要嘅電話接唔到又有咩所謂啫？
瑪花話佢唔係果啲齋八卦嘅低層次八婆，佢係一個有態度有堅持嘅超級八婆。
有次有個速遞送文件嚟，要瑪花收件蓋公司章。嗰陣瑪花同同事鈴姐八緊IT部門個新同事高妹俾大老闆叫入房，傾完喊到豬頭咁出嚟。鈴姐話聽講高妹洗晒公司啲客嘅舊紀錄，又有人話高妹格衰犯眾憎，出面仲有人傳話高妹俾佢阿頭搞，但佢阿頭gay㗎喎。瑪花聽到好興奮，不停話：「真係㗎？點解嘅？」完全當個速遞無到。個速遞企咗成十幾分鐘，終於㷫爆話：「八婆！你唔吸印就俾個印我自己吸，你唔使做我要做㗎！」瑪花於是喺5秒鐘內將公司印狂吸十幾次，同速遞話：「再嘈我起你底，八你啲嘢吖嗱！」
一個識起底嘅全職八婆有幾可怕？寫字樓個保安經理阿Ken，額頭有條好似哈利波特咁嘅疤痕，佢話係以前行山跌倒撞親。但係瑪花就用阿Ken個中文名喺新聞網站，搵到一單「少婦怒劈偷食男」舊料，個偷食男咁啱都係做保安經理。
瑪花由返工八到放工，點解大老闆都由佢？唔係點啫？
瑪花係老闆娘個表妹，老闆娘請佢返嚟就係要八，老闆有咩事都會俾佢八到。
至於高妹同老闆傾完喊，瑪花覺得事有蹺蹊一定要八到底。點解要咁堅持？當年表姐輸過血救佢，瑪花話呢份恩要報一世！