實不相瞞，我一直覺得Noomi Rapace好迷人，所以當知道她一人扮演七人，真係唔睇唔得。
先旨聲明，《獵殺星期一》不是一齣偉大的電影，但肯定是一齣好睇的電影。
渲染未來的電影，睇過唔少，例如細路時睇落的《RoboCop》、《Total Recall》、《The Running Man》，為我所呈現的未來，總是衰的——那種衰，通常不是衰到貼地，而是懶係美好地衰——硬件通常OK美好，例如啲樓起得好高好整齊(務求人人都有地方容身，至於有冇物業喺手，不是大前提)，啲車又可以飛嚟飛去(但依然塞車)……活在未來，只要你規行矩步，就能安居樂業。
這一個美好未來，全賴一個雷厲風行的政府。至於政府首長使唔使咁(高調地話俾人知佢)日做16、17粒鐘這麼黐線，就並非必然。
維持這一個表面美好新世界的政府，總是暗藏一種高壓，一種以冠冕堂皇高尚理由作支持的高壓。
《獵殺星期一》的高壓，來自那一孩政策。
未來世界人口爆炸，為讓人類在有限資源得以生存，不得不奉行一孩政策，生多咗的，惟有放進冷凍庫，雪到某一個時間，等地球的客觀條件變好了，才解凍(但幾時才算變好？冇人知)。
某名老竇，有個平日冇乜見面的女，一嘢唔該，就生咗七胞胎出來(她本人則在過程中死去)。老竇面對這七個孫女，眉頭一皺，計上心頭：為了讓七姊妹共同享有生存權利，決定讓她們Share一個身份，共同扮演一個人，Karen Settman。
從此，七個(人)只能活一個(身份)。
重點是：每人只能扮一日。為了統一「Karen」性格喜好，當日扮演的人需要跟其餘六人分享自己那一天所思所想，遇過愛過憎過甚麼人，以便第二天的扮演者貫徹下去，不致穿崩，反得永生。
對外公來說，這是一條絕對瞞天過海的靚橋，但原來前設是：1.他本人必需在場監督；2.七姊妹還是小朋友的時候。他以為天衣無縫，但算漏了一點：當七姊妹日漸長大、培養出個人性向，就會對「我」產生疑問，而不再/不能滿足於每星期只Cosplay一日「Karen」，(並在充分協調後務求以統一姿態)出外見人。
自我，只能在匿喺屋企時展現。
故事轉折來自「Monday」返工後失蹤，然後是一連串政府部門VS姊妹們的惡鬥(格局雖小，但夠殘忍暴力)；當中，存在了一個Twist，但不穿橋了……重點是，這個Twist抓緊了人性弱點，弱點微小而又真實，引發一連串始料不及的人命傷亡，但返本歸初最關鍵問題是：我已經在冇得揀情況下被拋落塵世了，偏偏因為有另一個人比我早出世，以致法例規定我不能苟活於人世？
為了生存，「我」，只能扮演「Karen」。即使「Karen」只是一個被安排的角色，七姊妹卻各用了屬於自己的方法和意志去演——「Karen」明明不是「我」，卻也是「我」。所以，身為電腦奇才的Friday，大禍臨頭時死都要把「Karen」的生活紀錄、一個有關七姊妹存．在．過的回憶Save下來。
人未必渴求不朽，但也不甘被任何高壓理由灰飛煙滅。