「有錢便任性」是很多客人的特質，甚至根本就是DNA……不過，就算是有錢，都有分「邊個有錢啲」以及「有錢都要講規矩」。
朋友L小姐半威迫半跪求，要小妹在人有三急都沒時間去解決的情況下，接了一份周刊大鱔稿來撰寫。客戶的要求是「乜都要盡快處理」！Anyway，基於「顧客永遠是對的」的原則，我們都盡快做好可以完成的部分——明星代言人的電話訪問、產品介紹的文字稿……冷不防客戶忽然要提前一個星期睇已完成好的稿件，理由是因為客戶自己下周要到日本，「到時會收唔到internet！好麻煩！」(吓？今時今日人人都會買sim card或租WiFi蛋遊日……客戶，你是甚麼年代的人呀？)還一副大石砸死蟹的模樣跟我和L小姐說：「其實你大可以做咗我份稿先囉！」口氣之大，還以為她是已經買了10期廣告的大客！L說：「大乜鬼嘢客？一期之嘛……仲要壓價添！」
客戶跟周刊的交易條文是怎樣，我沒有興趣知道，因為有兩件更重要的東西欠奉：1) 客戶要向我們提供的代言人造型照；2) 客戶需要的表達方式！因為客戶並非請專業攝影師，而是找一位「影相好靚」的朋友拔刀相助，但因為是業餘的關係，遲遲都未完成執相的後製部分，而客戶又不敢催促……至於表達方式，一時又想低調一時又想Hard sell，一天之內有三四次180度轉軚，相當估你唔到。
既然如此，試問又怎可以急工？連開工都成問題啦！不過，這位客戶似乎不想面對自己的過失，「總之你哋咁大間公司，一定得啦！」我作為一個小小的freelance writer，只有坐一旁剝花生……