公司隊Internal Audit一出現，大家都呆咗，因為其中一個人個頭竟然染咗紫色，襯埋條淺啡色牛仔褲，成個老麥芋頭雪糕咁。唔係呀嘛？而家連會計都冇dress code咩？
IA阿頭聽到，慌死芋頭雪糕俾我Mean親「嬲嬲豬」，即刻拉我埋一邊細細聲話芋頭雪糕做嘢好仔細，個人好聰明，只係佢同一般做Audit嘅形象唔同……又係嘅，香港提倡共融，我都應該包容啲。一睇就知佢地請唔到人，搵到個做到嘢，咪忍下囉，話之佢係芋頭定係綠茶紅豆，都係咁Welcome啦，唔係仲可以點啫？
IA阿頭自認係鵪鶉，我地有個客就似隻鬥雞，一旦成為佢嘅批鬥對象，就會俾佢狂啄，佢成日話佢個同事清純乖個Look唔掂唔Pro，叫佢「執好啲」。清純乖平日好韓風，成個女團成員咁返工，點知鬥雞姐話呢種MK Look唔襯公司。清純乖咪改行文青仙氣路線。鬥雞姐問，家陣你打算轉做作家定升上神枱呀？於是清純乖又改著套裝，鬥雞姐問佢係咪諗住去酒樓應徵做部長？清純乖頂唔順鬥雞姐玩針對，結果咪辭職囉。
同事話呢啲咪係際遇囉，芋頭雪糕際遇好，跟到隻鵪鶉；清純乖就際遇唔好，跟咗隻鬥雞，仲唔俾佢啄死咩！嗱，咁諗咪膚淺囉，際遇只係核心外圍元素，真正問題係自己有冇料到！你有料到，遇到鬥雞佢都自動變鵪鶉啦。
清純乖以為鬥雞姐係針對佢啲衫，其實佢阿姐根本係針對佢，要佢執好啲個人。清純乖份人好就得人，好無所謂。同佢做朋友，大家都好開心；但同佢做嘢就慘，佢完全唔明佢公司嘅要求，俾唔到方向我哋，佢叫我哋做嘅嘢，根本過唔到佢阿姐啲標準。最慘係佢啲態度又鬼咁好，即使要重做，大家唔捨得炳佢，結果咪攬炒，晚晚地獄輪迴式OT，做到個個謝晒。
清純乖唔明人Pro著咩都Pro。你有料，人哋就睇高你幾線。就算你話最鍾意MK Look，人哋都只係以為你話Michael Kors，邊個敢估Mongkok呀。