早前應Zespri邀請去新西蘭做訪問，參觀奇異果包裝工場、同CEO傾下偈呢啲指定動作當然少不了啦！你一定以為，成個旅程可以喪食奇異果？咁你就錯喇！(雖然我出發前都係咁諗)其實果農會將收成咗嘅奇異果，拎去指定地點檢測同分類，之後再將奇異果分為4個等級。頭等同次等嘅奇異果質素當然較好，就由Zespri買起，再出口到其他地方，包括香港。至於第三等級嘅奇異果，就會喺當地市場出售，超市見到最多嘅品牌就係Family。至於第四級嘅品質冇咁靚仔，就會用嚟做肥料又或動物飼料等其他用途。換句話說，香港買到嘅Zespri奇異果，品質係最好、最皮光肉滑嘅！亦即是話，我成個旅程一粒奇異果都冇食過！我懷疑亦係呢個原因，所以我生咗兩粒飛滋……
買咗個奇異果返嚟，到底要點先知道佢熟透未？奇異果果園主人就俾咗個貼士我，喺揀奇異果嘅時候可以揀啲生少少嘅，再將佢同蘋果或者香蕉放埋入個密實袋裡面，放喺溫暖嘅地方約5日左右，奇異果就會熟透，正正係最甜最juicy！Ready to eat！
下期再同大家分享點樣用奇異果煮嘢食啦！喂！你唔係以為我咁流教你用奇異果整果醬啊嘛？