講多次，如果你打算睇《祖孽》而又未睇，切勿睇落去。
我是在無預設情況下入場。當然，所謂「無預設」並非「100%無預設」，至少我大概預知這是一齣恐怖片，一齣涉及家庭的恐怖片，That’s All。至於有Ghost定無Ghost？多Blood定少Blood？我不知道。
散場，我滿足，我好滿足，我好X滿足。
1.導演Ari Aster第一齣長片，就拍出了一場布局精密的詭計——詭計不是到最後由某條友狀似寫說明書咁，一五一十自爆出來，又或透過無止盡Flashback畫公仔畫出內臟般交代，而是透過一些你絕不為意的對白，又或某些你唔多覺眼的畫面，由一開波，開始滲透。
2.牌面擺明是一齣恐怖片，但恐怖分好多種：A.可以是玩Jump Scare失驚無神嚇你一嘢(我不鄙視Jump Scare，只是鄙視某些玩得渣的Jump Scare，畢竟最易喚起恐怖感的現實狀況，就是在夜闌人靜渺無人煙時失驚無神有人Jump出來嚇你一嘢)；B.可以是陰啲陰啲，讓恐怖感在你心裡陰濕地滋生……《祖孽》屬於B，而且是一種改良版的B——用邪去製造恐怖。
3.邪，是一種感覺；《祖孽》的邪，從幼開始滲透，滲透在藏身於故事主軸背後的邪教組織。如果《祖孽》的恐懼之源是一隻Ghost，或許我在睇的過程中也會驚，但肯定唔會驚得深刻(兼在散場後回甘)，因為我根本唔驚鬼——唔驚鬼，是因為我根本就唔信有鬼(「唔信有鬼」&「享受睇鬼片」是兩回事來的)……偏偏在電影裡匿埋搞事嗰班友，原來由始至終都在進行一個嚴謹邪教儀式，讓他們敬畏的魔王成功佔據男主角肉身，就是因為這種貫徹始終的邪味，增添了一種真實感——一種絕對有可能出現在現實世界的真實感，即使成件事，明明好荒謬。
任何一齣戲，永遠有人鍾意有人唔鍾意，差別只是鍾意/唔鍾意的比率而已(正常情況，比率會偏埋其中一邊)；《祖孽》的鍾意/唔鍾意比率，好均等，又或者咁講：鍾意的可以好鍾意，唔鍾意的為了表達內心嗰份唔鍾意，可以動用好多方法，而所謂方法，不外乎一句說話。
方法/說話A：「超都唔驚嘅。」Yes，好多人總會抱持一種無懼玩機動遊戲的勇者心態入場睇恐怖片，如果不能夠令佢驚，就係渣。問題是，驚是一種絕對私有的心理狀態，旁人根本不能夠單從佢嗰句「超都唔驚嘅」，驗證佢內心深處淆底與否。
方法/說話B：「都唔夠乜乜咁勁囉。」說話中的「乜乜」，往往是某齣已被搬上神枱供奉的經典。Yes，他們總是以「經典護航人」的身份入場——經典早被供奉在神枱，永恆擁有神聖地位，所以要踩低一件新事物，最慳時間的方法就是搬經典出來。難怪每當要做那些經典恐怖片專題而又不得不徵詢某類影評人時，從他們口中噏出來的，不是《驅魔人》，就肯定是《閃靈》，感覺似乎是自從Kubrick拍了《閃靈》後，塵世間所有導演就撞了邪(或食咗屎)，唔再識得拍恐怖片(若將這種思維方式套用在哲學的理解上，柏拉圖和亞里士多德之後的哲學家即使都勁，但永遠都勁唔過柏拉圖和亞里士多德囉)。
上述兩種方法/說話，講到尾，都是一種預設，預設往往構成偏見；而當偏見得到大量冇腦的盲毛支持，就恍如一個邪教的開始。