雖然我同我老公感情的確不錯，但我哋生活係同一屋簷下，日對夜對，偶爾都會有睇對方唔順眼嘅時候。
例如前兩日我哋就為咗「到底間條衫應該當白色衫定深色衫咁洗」呢個無聊透頂嘅問題頂嘴；我老公覺得間條衫應該同白色衫一齊洗，而我就認為間條衫應該同其他間條衫一齊洗。公說公有理婆說婆有理，無論點拗都唔會拗得出個所以然來。嘈嘈下我把心一橫，我X！不如落街飲杯啤酒算啦。
時間關係，臨出門口前我已經按照我嘅方法將堆衫放咗入洗衣機。按個靚掣，返到屋企時成機衫已經洗到香噴噴。飲完兩杯返嚟，大家度氣消晒，心情靚晒，重有乾淨衫著𠻹。
喺做人老婆呢三年間，我學識一個道理：原來故意鬧交鬧輸都係一種學問。問問自己言語間嘅輸贏真的重要嗎？唔係教你耍心機做弱者，唔係要你佔下風百忍成金。而正正就係因為愛你，所以先唔想講道理。做任何事都可以認真，就係鬧交不用太認真。我諗鬧交嘅最高層次也莫過於此。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。