講起北歐嘅冬天，大家可能都會聯想起個凍字。瑞典冬天的確又凍又漫長，但佢難捱之處唔完全在於佢嘅寒冷，而係短得可憐嘅日光時間。
自每年於9月尾嘅秋分起，北半球以內地區就會開始晝短夜長，而且每日嘅日落時間都會提前一點點。以斯德哥爾摩為例，每朝差唔多8點45分先會日出，弱弱嘅日光僅短短維持幾個鐘，下晝2點45分左右太陽就會開始收工，通常差唔多3點鬆啲個天就會黑齊。呢個情況會持續到12月尾嘅冬至之後，自始每日嘅日落時間又會延後返一點點。直至6月尾嘅夏至，瑞典人叫佢做仲夏節，亦係全年日光時間最長嘅一日。呢一日瑞典人會喺室外同家人朋友聚餐，分享美酒同當造嘅食物，又會喺草地上跳舞助慶。如果你見識過瑞典冬天嘅黑暗，自然會明白點解瑞典人對仲夏節如此珍而重之。
記得細個時香港好興人造雪，其實就即係番梘泡。當時自己仲未見過雪，去飄雪落園玩到全頭全面都係泡，入眼入盛都好開心，過咗咁多年仍然記憶猶新。又記得幾年前剛好到杜拜轉機，當時佢哋機場入面有個類似Winter Wonderland咁嘅主題。場內開行冷氣，等旅客可以體驗一下冰天雪地嘅感覺，都幾得意㗎。喺斯德哥爾摩就有以「人造陽光」作為主題嘅咖啡店，入面有大燈有綠葉植物，等客人於寒冬之中都能夠感受一下太陽帶嚟嘅溫暖，想像自己置身熱帶國度。
疫情關係，今年睇怕應該邊度都冇得去。我都唯有上YouTube睇睇片，腦補陽光吧。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter