每個地方都有屬於佢自己嘅不明文規定同風俗，而瑞典嘅不明文規定同風俗特別多。之前同大家介紹過每年指定時節先可以食小龍蝦、小朋友逢星期六先可以食糖等等嘅風俗。今次想同大家介紹一道只有星期四先可以食嘅菜式—豌豆湯配鬆餅(瑞典語：Ärtsoppa och pannkakor)。
豌豆湯係一道歷史悠久嘅瑞典菜式，材料主要有豌豆、洋蔥，同鹹豬肉或者煙肉。瑞典人飲豌豆湯嘅時候會加入芥辣醬調味，配以沾上鮮忌廉或者果醬嘅香煎鬆餅。對唔少瑞典人嚟講，享用完豌豆湯同鬆餅過後，再飲返杯叫Punsch嘅瑞典甜酒，呢一餐先叫完整。
瑞典氣候長期寒冷，豌豆湯夠晒暖胃而且材料簡單，價錢大眾化，深受大眾歡迎，喺各類飯堂同餐廳都非常常見，但點解一定要星期四先可以食呢？原因要追溯至十三世紀，當時嘅瑞典人由於信仰，普遍會喺星期五進行齋戒，所以會喺星期四食得豐盛一點。豌豆湯配鬆餅夠晒飽肚暖胃，而且一般人都能夠負擔到，自然就成為唔少人嘅首選。雖然現今嘅瑞典人已經唔再進行齋戒，「星期四食豌豆湯配鬆餅」呢樣傳統卻得以留存落嚟。
記得第一次食豌豆湯同鬆餅，覺得兩樣食物大纜都扯唔埋。第二次食就覺得幾好味，不過感覺有點「漏」。第三次食，開始覺得佢哋係絕配，而且一定要喺星期四食先有feel。大家有機會嚟瑞典旅遊都不妨試試，記得要睇啱係咪星期四喎！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig ：sis3ter