仲記得美帝前國安顧問博爾頓(圖)？係呀，幾個月前先至被炒咗(佢聲稱係自己請辭而唔係侵侵炒佢)，好似神隱咗。原來佢嘅推特戶口，響被炒之後，白宮唔俾返佢。結果搞咗一大輪，上個月至開通返。咁當然又要睇下佢搞乜啦。依家美帝國會嘈緊要彈劾侵侵，據聞搵個博爾頓出席。博爾頓就話，佢準備出書講呢件事，依家就唔會去國會聽證會講嘢，有嘢都返留本書講。
你唔好話博爾頓無料到。侵侵當時炒佢時講過，如果聽晒博爾頓講，美帝要出兵平亂，至少都打過幾次戰爭。咁撇開呢部分唔講啦，博爾頓其實講中咗好多嘢。至少北韓問題上，博爾頓係覺得金將軍信唔過，唔應該同佢傾刁。早幾日大家睇到，金將軍開晒口話如果美帝仲咁樣迫佢哋，將有嚴重後果。博爾頓同埋佢地極右派之想法，打鋪戰爭，挫其氣燄，係俾人知道，壓迫自由世界之後果。侵侵基本上唔想出兵，呢一點已經畀世界各國睇通晒。所以，北韓先至咁惡，係未？
侵侵唔想出兵，唔代表佢唔會出兵。呢一點呢，大家要留意。上個月美軍出兵殺咗阿爾蓋達頭目巴格迪達，都係佢親自下令而成。除非真係無計可施，否則美帝總不可能依賴外國軍隊，要響敘利亞進行剌殺巴格達迪嘅行動。所以唔可能低估侵侵出兵的決心。早幾日北約會議，講明要針對北京威脅。呢鋪北京頭痕矣。
今次北約會議，東道主係英帝。仲有唔夠兩個星期英國大選，賽前估計，保守黨波叔輸到開巷。不過傻人真係傻福。英帝工黨彬叔，真係唔係好掂。民調顯示，工黨一直未破到三成。保守黨大抵有47-48%。勝負已腔相當明顯。至於全面支持BNO平權嘅自民黨，仍然都係百分之十幾左右。工黨搞來搞去，都郁唔到保守黨的溫和派票數。至於保守黨激進果班人，經保守黨安撫後，依家回巢及同極右嘅偶像，極右嘅奶嘴哥睇來都係收檔居多。既然保守黨有人應承咗會幫香港人之BNO平權，梗係好事，好多港人都想英國佬盡道義責住， 係未俾？信住先啦。
其實，英國12號大選，中美談判死線響12月15日。大家估，下個星期相當熱鬧。另一個焦點，就係台灣嘅總統選舉。Korean Fish依家日日有「黑幕」，畀人插到暈。早排傳佢響台北市有物業冇對外申報，搞到一頭煙。今個星期，就俾人話佢外父一家人，以權謀私，偷挖河砂，牟取暴利。一個星期一件醜聞，真係好睇過戲。English Choi民調過50%，於是Korean Fish又爆一句爛gag：「得民心得天下，得民調得痔瘡」。令人哭笑不得。
咁樣選情，難怪依家English Choi去拼立委，希望連立法院都大勝過半，繼續係綠營執政。明眼人都知，侵侵鐘意English Choi，亦希望繼續同English Choi結盟，一齊抗中矣。
倫敦大學亞非研究學院法律系博士