美國總統特朗普就美伊軍事行動發表電視講話。
舊年年中，開始傳出美帝侵侵身邊嘅國家安全顧問博爾頓，同侵侵不和。後來傳出侵侵私下講，批評博爾頓嘅分析，認為如果聽老博嗰套方案行事，美帝一早打緊幾場戰爭。同時又傳老博同侵侵身邊紅人不和啦，死未？
點解老博咁想出兵？咁又去返美帝右翼之中最極端嗰批，認為美帝應付外敵，係要回歸晒馬武力，即係要話俾敵人聽，美帝係唔怕打，而且願意打，因為好多時候，如果美帝單係打斯文交，只有文攻冇武嚇，冇用嘅，一定要敢於用兵。用呢套邏輯演繹：舊年年初，美帝高調支持委內瑞拉反對派，但最後點解冇辦法推翻現政府呢？就係因為美帝最後關頭，唔肯軍事介入。邊個唔肯出兵？梗係侵侵啦。
侵侵暗殺咗伊朗第二號人物，響極右眼中，係一個一早應該做嘅事。只係唔知點解侵侵做得太遲。美帝咁精準地用無人機，殺害其他國家領袖，除咗證明軍力厲害之外，亦顯示佢地情報等各方面，一樣咁精準。呢啲會震懾其他獨裁國家領袖，for a moment啦。但中東呢？伊朗雖然軍力強勁，亦有相當實力，但美帝嘅盟友以色列，先至係令伊朗最頭痛嘅國家。
回到海峽局勢。台灣總統選舉，大局已定。焦點當然係下星期後，綠營響立法院會唔會過半。上星期，綠營話有十個危險戰區會輸立委，今個星期就由十個變成十五個。聽到似出口術居多。當然啦，呢個星期係催票周，成個社交媒體都係不斷呼籲選民返屋企投票，綠營唔製造一下緊張氣氛，點可以谷到票呢？藍營就話，立法院委員保底應冇問題，又希望支持者回家投票谷到過半。身邊好多朋友係綠營，仲係好奇怪點解藍營會贏。有時候，大家都要自我反省下，因為個人政治路線係親綠，自自然然就同藍營嘅人疏遠咗，加埋社交媒體同溫層效應，往往就唔係好好咁去接收對家嘅資訊。老實，響台灣，藍營梗係有市場啦，佢地未必鍾意Korean Fish，但就一定好憎English Choi，咁響求穩定嘅市民眼中，投藍營好過投綠色啦。
留意埋澳洲山火。係未成個澳洲都燒晒？又未至於咁誇張，但係總理莫里森就真係好唔掂，記者會做了人肉錄音機，而且話滅火要靠天意。大家都明白，呢種世紀級大火，靠依家消防部門處理，真係杯水車薪。係未要搵外援？當然有啦。早排就有一批美帝嘅專家飛去澳洲嗰邊幫手。美帝消防員固然有幫手，原來仲有一堆專家，包括氣象專家，山火處理專家，仲有動物行為專家等等，去評估同埋交流經驗。睇完個報道，似乎係澳洲政府做嘅山火相關研究，仲係唔夠多。政府唔單只要救火，而係要用更多資源做好科研工作。美帝強勁唔單只響軍事方面，而係做好研究及發展。