公司接咗個大Project，唔夠人做，請咗個兼職，佢返咗兩個星期我先發現佢原來係「火星人」！佢啲伏，我中晒！
第一個禮拜，由於「火星人」扮緊地球人，所以仲算溝通到我叫佢搵創作部對齊晒啲製作spec，同出個時間表，佢覆我話收到。但第二個禮拜，無樣嘢做到。原來對「火星人」嚟講，收到唔等於做到。同個客開會，大家講工作進度，佢全程放空，又唔抄notes，結果佢個report九成都係錯嘅。我叫佢下次開會要攞電話錄晒音，之後聽返抄重點。我抦佢，佢又放空，肉身喺地球，元神明顯返咗火星。
第二次開會，「火星人」一坐低就即刻攞個電話出嚟，鬼咁緊張，手都震晒。我問自己，打份工啫，使唔使搞到個同事咁大壓力呀？「火星人」可能唔係好識用電話錄音，我教佢：「你要將個電話擺近啲個客個位，陣間佢講嘢先收得清楚。」
「火星人」碌大對眼望住我話：「點解個客要同我個經紀講電話，佢都買咗孖展咩？」我嬲爆話： 「你攞個電話出嚟，原來係等經紀打俾你？」佢對眼再碌大啲話：「你唔係以為我攞個電話出嚟等同客影相呀？」
一係沽空，一係放空，一張一弛，呢啲「火星人」節奏我跟唔到囉。而「火星人」獨特嘅時間概念，又係我想像唔到嘅。同事叫佢check香港有冇供應商做到我哋要求嘅模型格式，佢一望個list即刻話：「要一星期內同十幾間公司Check咁多個項目，邊夠時間呀？」
結果，嗰個星期「火星人」要做到半夜先放工。佢真係「好忙」㗎，一早返到公司飲杯咖啡都要成半粒鐘；打電話俾啲供應商，撞到個好傾嘅，又要吹吓水，順便呻下香港買樓有幾難，仲要睇吓FB同check吓股價，當然仲有放空啦。工作時間好似隕石咁散落喺浩瀚宇宙裡面，我呢種連霍金講咩都聽唔明嘅低智地球人，又點會明「火星人」個腦諗咩吖？
簡介：市場部大姐，見慣風雨，更見盡職場瘋語。深明同事俾面就叫嫣姐，背後則叫她Mean姐，因為無嘢逃得過她的mean眼。