我認識一位患有抑鬱症的朋友，她生於一個富裕家庭，也正正因為自小「要乜有乜」，家人完全不明白她為甚麼會患上抑鬱症。父母曾經對她的病徵視而不見，覺得她晚晚掛住上網，終日烏眉瞌睡，也覺得她身在福中不知福。父母對於她的沒精打彩最看不過眼，經常罵她恍如喪屍一樣，萎靡不振，行屍走肉。她告訴我，她也無辦法控制自己的情緒。她以喪親為例，幻想一下喪親的悲痛，她說她每天睜開眼，感覺就好像喪親一樣。喪親的衝擊還可以讓時間沖淡，但她卻日復一日地被這種抑鬱纏繞住。以下是她的獨白，希望所有人都明白和重視情緒病。
「我好攰，呢句說話可以包含很多意思，唔只係因為唔夠瞓。當我講我好攰，唔單止係我身體上好攰，其實我精神上都好攰，我整個人都好攰，就算我已經瞓咗成晚，我依然好攰。呢種攰唔單止係講緊手腳無力，頸梗膊痛，唔單止係打呵欠咁簡單，或者人地所講：『咁你瞓多陣啦！』而係你每朝起身、換衫、刷牙、洗面時，都覺得好迷茫，到離開屋企一刻，整個人仍然好呆滯，好虛脫，甚至可以用迷失去形容。外面嘅天空永遠係灰嘅，但係我冇得選擇，仍然要繼續去過每一日。我知道呢啲全部都係因為情緒病。當人地問我：『你點呀？』我會答：『冇嘢，係攰啲啫。』攰，對大部分人嚟講都係普通不過嘅事，但係我嘅攰，通常連帶抑鬱同埋焦慮。所以當你身邊有人同你講：『我好攰！』或者你需要諗多少少，諗遠少少。我其實並唔需要再瞓覺，我需要嘅係關心，係愛，同埋需要你地嘅明白。」
