一起身，我突然感恩：做人，有時真係好開心，因為就快有得睇《攻殼機動隊》(裡穿上貼身戰衣的Scarlett Johansson)！但也有遺憾，下周先上畫有排苦等。
生而為人，可以好開心，也可以好遺憾。但不論開心定遺憾，你點知道自己真係人？
請注意上述問題，不是當見到某啲人幹出禽獸行為時憤怒質問「你話你係咪人？」，而只是好單純地，要求你好肯定咁答：你憑甚麼肯定自己真係人——亦即真係Human？可以有多種答法。
1.「我肚餓時會食嘢(可以是叉燒飯可以是Buffet也可以是放題)，所以我係人。」——難道禽獸(中性意義，即飛禽走獸)肚餓時就不需要食嘢？
2.「我食飽飯會屙Shit，所以我係人。」——嗱，即係咁，我每日都要執砂盤的喵Shit，因為我的喵也會屙Shit。
3.「我一見到Scarlett Johansson就好想黐埋去！我太鍾意Scarlett Johansson！所以我係人！」——如果我的喵見到SJ都黐埋去揩嚟揩去，咁我的喵即係……
4.「我公司張枱擺滿文件同紙，所以我係人，而且是個Work Hard的人。」——Well，塵世間部部影印機都放滿A4紙和A3紙。
5.「我公司張枱一塵不染光潔如新，所以我係人，而且是個Work Smart的人。」——其實打完臘的地板也是一塵不染光潔如新。
還可以繼續列舉，但就算俾你列舉出表面睇來再似層層的理由，都未必能夠作為解釋「我係人」的充分條件。
當然你可以話：我係人，因為我擁有人類的Body結構。OK，不妨設想以下情況：你一出世，就唔知點解地被安排住在一間房，房三面是牆，有一面則裝上透明玻璃；透過玻璃，你既望見自己在玻璃上反射的影像，同時望見對面房也住著一個跟你擁有相同Body結構的，「嘢」。
生活靜靜似是湖水。你餓時會有嘢食，食飽後又會屙Shit，除了沒有SJ相伴，日子過得比較悶，但勝在唔使Work(不用Work Hard也不用Work Smart)。直至某一日，你瞓醒，望見對面房嗰個「嘢」攤喺地，個Body離奇地散開晒，你發現，Body內的竟然是各種複雜機器和金屬管，而頭裡面，乜都冇。
有理由相信，除了驚訝，你只會認為自己Body內也是塞滿呢啲機器和金屬管，而頭裡面，乜都冇。
用懶係存在主義式的說法，我們一被拋擲到這世界，就以「人」的身份成長、生存，期間我們會肚餓會急Shit——為了醫肚我們要返工搵食(無論Work Hard定Work Smart，都係要Work都係打人工)，若遇上急Shit就要搵廁所，畢竟我們是「人」而不是禽獸不能隨地屙。遇上靚的事物(例如Scarlett Johansson)，就會產生所謂「正呀」、「好鍾意呀」、「俾我溝到佢就好嘞」的意念，但以上種種好似只有「人」才會具有的行為和意識，其實，機械人一樣可以擁有——只要機械人個人工腦晨早被輸入各種(好似)「人」才具有的意識。
回想當年《攻殼》動畫電影版，作為女機械人的草薙素子，某一日失驚無神開始反問：我有意識，但又唔算係人……那麼，我同「人」的分野究竟喺邊？
我自然不知道荷李活真人版會否延續(如會，又怎樣回答)這深邃提問，但穿上高科技貼身戰衣的Scarlett Johansson，實在非常吸引——而喺呢個Moment，我好肯定自己係人，一個熱愛Sci-Fi而又血氣方剛的男人。