在社會上工作多年之後，有沒有發現，許多工作上遇到的麻煩，原來都是因為自己之前做得太好？
最常見的例子，大概是老闆給你的target。上年老細給你一千萬target，你好努力再加上行運，埋單做了千二萬。老細同你講：「叻仔！公司真係幸運可以請到你呢個夥計。下年target加到千五萬啦。」千五萬？唔係吓話？跑一千萬數都掹掹緊咋喎…如果唔係年尾咁啱好彩簽咗張大單，今年就meet唔到target啦……「唔使講啦，你今年咁叻仔爆數喎，加少少target，唔係咁都話唔掂啩？你喺呢度，大師兄嚟㗎啦，做個好榜樣俾班細嘅睇，OK？」
剛過去的假期，我到了新加坡探望一個朋友。朋友兩年前被公司調升到那邊做開荒牛。兩年過去了，由朋友一手建立的新加坡分公司，也上了軌道，而且盈利也很不錯。我跟朋友說：「呢邊做得咁好，你應該安樂晒啦！」
「公司就安樂，我就唔多安樂啦。」朋友答得很洩氣。
「吓？公司又加你target嗎？」
「如果淨係加target就好啦。公司見我做開荒牛做得幾好，想調我去第二度做多次開荒牛呀。」去邊度先？「你估唔到啦……今次去越南。啱啱先安頓好晒啲細路喺呢度讀書，依家又想郁我啦。我一個男人冇所謂，老婆同細路點呀？」有冇得say no呀？「嘿，上次話調去印尼，我say咗一次no啦，quota用咗啦。再say no就真係冇得撈啦。」
我心諗，朋友工作如果做得不好，大概他就不會被留任了……又或許，他根本沒可能升到現在的高位。但他做得出色，當想稍為定下來的時候，就因為他過往的成績，被公司逼去四處開山劈石，過著遊牧民族般的生活。有時想一下，努力做事，然後又真的做出成績了，但到頭來，值得嗎？
「愈嚟愈覺得唔值得，有時直頭覺得顛覆晒後生時候對努力工作嘅諗法……」朋友嘆氣：「只係又未搵夠錢退休，冇選擇而已。」
最近，就連我自己也遇到點意想不到的麻煩。那天在董事局裡，討論著來年的budget時，那位沒有參與營運的股東忽然說：「CK，其實你唔使加咁多人工俾同事啦，依家個market咁唔明朗，加咗對公司冇好處。」咩道理呀？公司賺少咗好多錢咩？抑或你有啲咩唔滿意呀，開句聲吖……「你公司人手咁穩定，咪正正係你加人工太鬆手嘅最佳證據囉。」
聽完，幾乎想打人。
工作做得不好，固然是你錯，後果也要自負。但即使工作做得好，還是會有更多問題找上門。於是對很多人而言，做得好，也變成了自找麻煩，這樣一來，誰還願意努力認真工作？