旅遊發展局昨日公布最新的訪港旅客數字，錄得輕微上升，今年頭7個月有3,298萬旅客訪港，而7月份就有517萬人，均按年升2.4%。不過上半年數據顯示，過夜旅客的留港時間微跌至3.2晚，按年跌0.1晚，而過夜旅客人均消費亦下跌至6,250元，按年跌3.7%。
旅發局主席林建岳(左)同總幹事劉鎮漢出席解畫，話嚟緊9月起會以1,200萬元提供優惠，吸引旅客延長留港，及鼓勵過境旅客利用留港時間多些消費。劉鎮漢話，經香港機場過境人數一直有增長，每年有2千萬人，調查顯示如果佢哋留港超過6小時，就可能有興趣到市區旅遊及消費，於是旅發局與本地航空公司合作，提供4項優惠吸引呢批潛在旅客，包括免費送出機場快線即日來回票、以優惠價去迪士尼享用午餐或下午茶連接送、以優惠價參觀昂坪360連接送、及以優惠價快閃玩迪士尼。
至於吸引留港旅客多留一晚的優惠亦好筍，全為本地遊免費套餐，4選1，包括Big Bus Tours、港島精華遊等，價值由430至737元不等，差不多等於免費住一晚。
