朋友問我返咗香港之後對日常生活方面習慣唔習慣。講真自己喺度土生土長，返到嚟失而復得嘅感覺點都會大於唔習慣。而其一最樣最令我感到安慰嘅，就係早餐呢回事。
一日之計在於晨，早餐對我嚟講係一樣好重要嘅事。一個完美嘅港式早餐，能夠將一個睡眼惺忪嘅人變返精神、一個本來精神嘅人變得神采飛揚。以前仲喺香港同阿爸阿媽住嗰陣，最鍾意喺放假嘅時候，一早去屋企附近茶餐廳整個五香肉丁米、加啲辣椒油，畫龍點睛，再輕輕鬆鬆嘆番個熱檸茶，當日就圓滿咗一半喇。除咗茶餐廳套餐，仲有白粥、炒麵、雞扒炒蛋等等任君選擇。尤其係天氣凍嘅時候，用熱辣辣嘅早餐去開始一日，係何等美好嘅一件事？
雖然瑞典天氣就夠晒凍，瑞典人對用熱食作為早餐並唔熱衷。喺一般瑞典人家庭，最普遍嘅早餐會有營養豐富嘅乳酪、穀物、燕麥、三文治、麵包等等。就算係外面買嘅早餐，極其量會個暖暖地嘅牛角包，全個早餐嘅熱嘢恐怕係杯咖啡。呢個係我一直以嚟打唔開嘅心結，味道再怪嘅食物我都敢試同嘗試適應，但又凍又乾嘅早餐對我嚟，仍然需要大量時間去難克服。
當然三餐不愁已經教人感恩，不過對我嚟講，任瑞典早餐再營養豐富，一份熱騰騰嘅茶餐廳早餐帶嚟嘅紮實感、滿足感同人情味係無可比擬㗎。我而家人在香港，一有機會就會好好感受呢份帶有感情同溫度嘅文化。
假若他朝有機會，我必定要將熱食早餐同港式茶餐廳文化喺瑞典發揚光大，溫暖一下早起的鳥兒嘅心同胃。
